Chiranjeevi: చిరంజీవి ఇంట శివ రాజ్‌కుమార్‌.. ఆ ఫొటో ఫ్రేమ్‌ వైరల్‌

ఇంటర్నెట్‌ డెస్క్‌: కన్నడ ప్రముఖ నటుడు శివ రాజ్‌కుమార్‌ (Shiva Rajkumar).. చిరంజీవి (Chiranjeevi) ఇంట సందడి చేశారు. కేంద్రం చిరుకి పద్మవిభూషణ్‌ పురస్కారం ప్రకటించిన నేపథ్యంలో కంగ్రాట్స్‌ చెప్పేందుకు బెంగళూరు నుంచి హైదరాబాద్‌కు వచ్చారు. పుష్పగుచ్ఛం అందజేసి, శుభాకాంక్షలు తెలిపారు. అనంతరం ఇరువురు కాసేపు ముచ్చటించారు. సంబంధిత ఫొటోలను చిరంజీవి సోషల్‌ మీడియా వేదికగా పంచుకుంటూ.. ‘‘డియర్‌ శివ రాజ్‌కుమార్‌.. నన్ను అభినందించేందుకు మీరు బెంగళూరు నుంచి రావడం హృదయాన్ని హత్తుకుంది’’ అని పేర్కొన్నారు. ఆయనతో కలిసి భోజనం చేయడం, లెజండరీ నటుడు రాజ్‌కుమార్‌ (శివ రాజ్‌కుమార్‌ తండ్రి)తో ఉన్న అనుబంధాన్ని గుర్తుచేసుకోవడం ఆనందంగా ఉందన్నారు. ఆ ఫొటోలు నెట్టింట అందరి దృష్టిని ఆకర్షించగా వాటిలో కనిపించే ఓ ఫొటో ఫ్రేమ్‌ చక్కర్లు కొడుతోంది. అదేంటంటే?

ఈ ఫొటో బ్యాక్‌గ్రౌండ్‌ గమనించారా? చిరు అందుకున్న ‘నంది’సహా పలు అవార్డులతోపాటు తనయుడు, హీరో రామ్‌ చరణ్‌తో కలిసి దిగిన ఫొటో ఫ్రేమ్‌ మిమ్మల్ని ఆకర్షిస్తోందా?. దీనిపైనే ఫోకస్‌ పెట్టిన అభిమానులు ‘ఫ్రేమ్‌ అదుర్స్‌’ అంటూ కామెంట్లు పెడుతున్నారు.

నంది అవార్డులకు గద్దర్‌ పేరు.. ఆ నిర్ణయం సముచితమే: చిరంజీవి

రామ్‌ చరణ్‌ (Ram Charan) హీరోగా బుచ్చిబాబు సానా తెరకెక్కించనున్న చిత్రంలో శివ రాజ్‌కుమార్‌ కీలక పాత్ర పోషించనున్నారు. ఎ. ఆర్‌. రెహమాన్‌ సంగీతం అందించనున్నారు. క్రీడా నేపథ్యంలో ఆ సినిమా రూపొందనుందని సమాచారం. మరోవైపు చిరంజీవి ‘విశ్వంభర’ (Vishwambhara) చిత్రీకరణలో పాల్గొంటున్నారు. సోషియో ఫాంటసీ నేపథ్యంలో దర్శకుడు వశిష్ఠ తెరకెక్కిస్తున్న ఈ సినిమా వచ్చే ఏడాది జనవరి 10న విడుదల కానుంది.