వారు వింటున్నారని ఆశిస్తున్నా: అభిమానులకు సుదీప్‌ రిప్లై

ఇంటర్నెట్‌ డెస్క్‌: రాజమౌళి తెరకెక్కించిన ‘ఈగ’ చిత్రంతో తెలుగువారికి పరిచయమైన కన్నడ నటుడు కిచ్చా సుదీప్‌(Kiccha Sudeep). గతంలో తాను సంవత్సరానికి రెండు సినిమాలు చేయాలనుకుంటున్నానని తెలిపారు. దీనిపై స్పందించిన అభిమానులు ఏడాదికి ఒక్క సినిమా అయినా చేయండని ఎక్స్‌ వేదికగా కోరారు. ‘‘నేను ఇచ్చిన మాటను నెరవేర్చుకోడానికి ప్రయత్నిస్తున్నాను. నాతోపాటు చిత్ర బృందం వేగంగా వర్క్‌ చేయాలి. ఇప్పటికైనా వింటుందని ఆశిస్తున్నా. మీ మాటను నేను హెచ్చరికగా తీసుకుంటున్నా. మీరు కోరుకునేవిధంగా సినిమాలు చేస్తాను’’అని సుదీప్‌ సరదాగా సమాధానం చెప్పారు. 

‘‘నా 28 ఏళ్ల కెరీర్‌లో నేను ఉత్తమ నటుడినని చెప్పను. కానీ నాకిచ్చిన ప్రతీ పాత్రకు వందశాతం న్యాయం చేయడానికి ప్రయత్నిస్తాను. ఇది నాకు దేవుడిచ్చిన బహుమతిగా భావిస్తున్నా’’అని సుదీప్‌ ఇటీవల సోషల్‌ మీడియాలో కృతజ్ఞతలు తెలిపారు. 

సుదీప్‌ ‘విక్రాంత్‌ రోణ’(Vikrant Rona) తర్వాత మ్యాక్స్‌లో నటిస్తున్నారు. ఈ చిత్రంతో విజయ్‌ కార్తికేయన్‌ దర్శకుడిగా పరిచయమవుతున్నారు. మరో రెండు, మూడు నెలల్లో చిత్రీకరణ పూర్తి చేసి వేసవిలో విడుదల చేయాలని చిత్రబృందం భావిస్తుందని సన్నిహత వర్గాల సమాచారం. ప్రస్తుతం వరుస సినిమాలతో సుదీప్‌ బిజీగా ఉన్నారు.