Aadujeevitham: ఆ పాత్ర కోసం 31 కిలోలు బరువు తగ్గాను: పృథ్వీరాజ్‌ సుకుమారన్‌

ఇంటర్నెట్‌ డెస్క్‌: ‘సలార్‌’లో వరద రాజమన్నార్‌ పాత్రలో నటించి మంచి గుర్తింపు తెచ్చుకున్నారు పృథ్వీరాజ్‌ సుకుమారన్‌ (Prithviraj Sukumaran). ఆయన ప్రధాన పాత్రలో నటించిన మలయాళ చిత్రం ‘ఆడుజీవితం’ (Aadujeevitham). బతుకుదెరువు కోసం కేరళ నుంచి సౌదీకి వెళ్లిన నజీబ్‌ అనే వ్యక్తి జీవిత కథ ఆధారంగా బ్లెస్సీ ఈ చిత్రాన్ని తెరకెక్కించారు. ఇందులో అమలపాల్‌ కథానాయిక. ‘దిగోట్‌ లైఫ్‌’ పేరుతో ఇంగ్లీష్‌లోను విడుదల కానుంది. ఈ చిత్రం మార్చి 28న ప్రేక్షకుల ముందుకు రానుంది. ప్రమోషన్స్‌లో భాగంగా పృథ్వీరాజ్‌ ఓ ఇంటర్వ్యూలో మాట్లాడారు. 

‘‘ఈ సినిమాలో నేను నజీబ్‌ అనే బానిస పాత్ర పోషించాను. దానికోసం 31 కిలోలు బరువు తగ్గాను. జిమ్‌ ట్రైనర్‌, పోషకాహార నిపుణులు, డాక్టర్స్‌ పర్యవేక్షణలో ఇది సాధ్యమైంది. వారు నన్ను విశ్రాంతి తీసుకోమని సూచించేవారు. కానీ కొన్ని సందర్భాల్లో 72 గంటలు షూటింగ్‌లో ఉండాల్సి వచ్చేది. కరోనా లాక్‌డౌన్‌తో చిత్రబృందం ఇబ్బందులు ఎదుర్కొంది.  పశ్చిమాసియాలోని జోర్డాన్‌ ప్రాతంలో షూటింగ్‌ చేస్తున్నప్పుడు లాక్‌డౌన్‌ ప్రకటించారు. మూడు నెలలు జోర్డాన్‌ రాయల్‌ ఫిల్మ్‌ కమిషన్‌ మమ్మల్ని ఆదరించింది. ఈ సినిమా కోసం మేమందరం చాలా కష్టపడ్డాం. ఈ విషయాలను తెలియజేయడానికి ఇదే సరైన సమయం అనిపింది. అందుకే చెప్పాను’’ అని పృథ్వీరాజ్‌ వెల్లడించారు.