Raakshasa Kaavyam Ott: ఓటీటీలో రాక్షస కావ్యం.. స్ట్రీమింగ్‌ ఎక్కడంటే?

హైదరాబాద్‌: అభయ్‌ నవీన్‌, కుశాలిని, అన్వేష్‌ మైఖేల్‌ ప్రధాన పాత్రల్లో నటించిన చిత్రం ‘రాక్షస కావ్యం’ (Raakshasa Kaavyam). శ్రీమాన్‌ కీర్తి దర్శకుడు. దామురెడ్డి, శింగనమల కల్యాణ్‌ సంయుక్తంగా నిర్మించారు. మైథాలజీని, నేటి సామాజిక పరిస్థితులను అన్వయించి రూపొందించిన ఈ సినిమాలో , పవన్‌ రమేష్‌, రోహిణి తదితరులు కీలక పాత్రలు పోషించారు. అక్టోబరు 6న ప్రేక్షకుల ముందుకు వచ్చిన ఈ సినిమా బాక్సాఫీస్‌ వద్ద ఆశించిన విజయాన్ని అందుకోలేకపోయింది. ఇప్పుడు ఓటీటీ వేదికగా అలరించేందుకు సిద్ధమైంది. తెలుగు ఓటీటీ వేదిక ‘ఆహా’లో డిసెంబరు 15వ తేదీ నుంచి స్ట్రీమింగ్‌ (Raakshasa Kaavyam ott release date) కానుంది. ఈ విషయాన్ని తెలియజేస్తూ ఆహా కొత్త పోస్టర్‌ను విడుదల చేసింది.

ఇంతకీ కథేంటంటే: అజయ్‌ (అభయ్‌ బేతగంటి) ఓ కాంట్రాక్ట్‌ కిల్లర్‌. చదువుకున్న వాళ్లంటే అతనికి గౌరవం. మరోపక్క విజయ్‌(అన్వేష్‌ మైఖేల్‌)కి సినిమాల పిచ్చి. హీరోల కంటే విలన్లు అంటేనే ఎక్కువ ఇష్టం. విలన్లకు న్యాయం చేయడానికి తనే ఓ సినిమా తీయాలని ప్రయత్నిస్తాడు. చెడులో మంచిని చూడగలగడం అజయ్ వ్యక్తిత్వమైతే.. మంచి మీద చెడు గెలవాలి అనుకోవడం విజయ్ క్యారెక్టర్. ఈ క్రమంలో అజయ్‌ను చంపడానికి విజయ్‌ ప్రయత్నాలు చేస్తూ ఉంటాడు. అసలు అజయ్‌, విజయ్‌లకు మధ్య ఉన్న సంబంధం ఏంటి? అజయ్‌ తల్లి ఎలా చనిపోయింది? హత్యలు, సెటిల్‌మెంట్స్‌ చేస్తూ సంపాదించిన డబ్బును అజయ్‌ ఏం చేశాడు? సొంత తండ్రిని ఎందుకు దూరం పెట్టాడు? అజయ్‌, విజయ్‌ల కథ ఏంటి అనేది తెలియాలంటే రాక్షస కావ్యం చూడాల్సిందే.