Thalapathy 67: ‘దళపతి67’ సినిమాపై క్రేజీ అప్‌డేట్స్‌ ఇచ్చిన చిత్రబృందం.. నటీనటులు వీళ్లే

హైదరాబాద్‌: ఈ ఏడాది ‘వారిసు’ చిత్రంతో మంచి విజయాన్ని సొంతం చేసుకున్నాడు హీరో విజయ్‌(Vijay). ఇదే జోష్‌తో ‘దళపతి67’ (Thalapathy 67)(వర్కింగ్‌ టైటిల్‌) షూటింగ్‌లో పాల్గొంటున్నడానికి సిద్ధమయ్యాడు. ‘విక్రమ్‌’ సినిమాతో సూపర్‌ హిట్‌ను అందుకున్న లోకేశ్‌ కనగరాజ్(‌Lokesh Kanagaraj) ఈ చిత్రానికి దర్శకత్వం వహిస్తున్నారు.  గ్యాంగ్‌స్టర్స్‌ నేపథ్యంలో రూపొందనున్న ఈ చిత్రంపై ఇప్పటికే అభిమానులు భారీగా అంచనాలు పెట్టుకున్నారు. ఈ సినిమాలోని నటీనటుల గురించి చిత్రబృందం ఈరోజు అధికారికంగా ప్రకటించింది. ప్రస్తుతం ఈ పోస్టర్లు సోషల్‌మీడియాలో సందడి చేస్తున్నాయి.

సినిమాకు కథానాయకుడు ఎంత ముఖ్యమో ప్రతినాయకుడూ అంతే ముఖ్యం. ఈ సినిమాలో విలన్‌ పాత్రను బాలీవుడ్‌(Bollywood) అగ్ర హీరో సంజయ్‌ దత్‌(Sanjay Dutt) పోషించనున్నారని గత కొన్నిరోజులుగా నెట్టింట వార్తలు వస్తోన్న విషయం తెలిసిందే. ఇప్పుడు ఈ వార్తలను నిజం చేస్తూ.. చిత్రబృందం పోస్టర్‌ విడుదల చేసింది. ‘‘దళపతి67 లో సంజయ్‌దత్‌ భాగమైనందుకు సంతోషంగా ఉంది’’ అని ట్వీట్‌ చేసింది నిర్మాణ సంస్థ. దీనిపై సంజయ్‌దత్‌ మాట్లాడుతూ..‘‘నేను ఈ సినిమా గురించి ఒక్క లైన్‌ వినగానే కచ్చితంగా ఇందులో నటించాలని అనుకున్నాను. ఇంత మంచి ప్రాజెక్టులో భాగమవుతున్నందుకు ఎంతో ఆనందంగా ఉంది’’ అన్నారు. 

అలాగే ఈ సినిమా(Thalapathy 67)లో ప్రియా ఆనంద్‌ (Priya Anand), డ్యాన్‌ మాస్టర్‌, నటుడు శాండీ, దర్శకుడు మిస్కిన్‌,  నటుడు మన్సూర్‌ అలీఖాన్‌లు, మాథ్యూ థామస్‌ తదితరులు ఇందులో నటిస్తున్నారు. ఈ అప్‌డేట్స్‌తో విజయ్‌ సినిమాపై అంచనాలు తారాస్థాయిని తాకుతున్నాయి. విజయ్‌ వర్సెస్‌ సంజయ్‌ కాంబినేషన్‌ను తెరపై చూసేందుకు విజయ్‌ అభిమానులతో పాటు సినీప్రియులు ఆసక్తిగా ఉన్నారు.