VarunTej-Lavanya: వేడుకగా వరుణ్‌ తేజ్‌ - లావణ్య నిశ్చితార్థం.. మెగా, అల్లు హీరోల సందడి

హైదరాబాద్‌: రీల్‌ కపుల్‌ వరుణ్‌ తేజ్‌ (VarunTej) - లావణ్య త్రిపాఠి (Lavanya Tripathi) రియల్‌ కపుల్‌ కానున్నారు. త్వరలో వీరి వివాహం జరగనుంది. ఈ క్రమంలో శుక్రవారం సాయంత్రం వీరి నిశ్చితార్థం వేడుకగా జరిగింది. హైదరాబాద్‌లోని నాగబాబు నివాసంలో జరిగిన ఈ వేడుకలో ఇరు కుటుంబాలకు సంబంధించిన పెద్దలు, అత్యంత సన్నిహితులు మాత్రమే పాల్గొన్నారు. దీనికి సంబంధించిన కొన్ని ఫొటోలు తాజాగా బయటకు వచ్చాయి. వీటిని చూసిన నెటిజన్లు కొత్త జంటకు శుభాకాంక్షలు చెబుతున్నారు. వరుణ్‌తేజ్‌ - లావణ్య ఎంగేజ్‌మెంట్‌ సందర్భంగా సోషల్‌మీడియాలో #VarunLav హ్యాష్‌ట్యాగ్‌ ట్రెండ్‌ అవుతోంది.

2017లో విడుదలైన ‘మిస్టర్‌’ కోసం వరుణ్‌ - లావణ్య తొలిసారి కలిసి పనిచేశారు. ఈ సినిమా సమయంలోనే వీరిద్దరూ స్నేహితులయ్యారు. ఆ తర్వాత ఏడాదిలోనే వీరి కాంబినేషన్‌లో ‘అంతరిక్షం’ వచ్చింది. ఈ క్రమంలోనే వీరి స్నేహం ప్రేమగా మారినట్లు తెలుస్తోంది. ఏడాది చివర్లో వీరి పెళ్లి జరగనున్నట్లు సమాచారం.

ఇక, వరుణ్‌ తేజ్‌ సినిమాల విషయానికి వస్తే ప్రస్తుతం ఆయన నటిస్తున్న ‘గాండీవధారి అర్జున’ చిత్రీకరణ దశలో ఉంది. ఆగస్టు 25న ఈ చిత్రం విడుదల కానుంది. ఈ సినిమా పూర్తైన తర్వాత వరుణ్‌.. శక్తి ప్రతాప్‌ సింగ్‌ దర్శకత్వంలో ఓ పాన్‌ ఇండియా ప్రాజెక్ట్‌, కరుణ్‌కుమార్‌ దర్శకత్వంలో మరో సినిమా చేయనున్నారు. మరోవైపు, లావణ్య ప్రస్తుతం కోలీవుడ్‌లో ఓ సినిమా చేస్తున్నారు. అధర్వ హీరోగా ఇది తెరకెక్కుతోంది. పీపుల్స్‌ మీడియా ఫ్యాక్టరీ నిర్మించనున్న ఓ సినిమాలో అలాగే, అన్నపూర్ణ స్టూడియోస్‌ బ్యానర్‌పై రానున్న ఓ వెబ్‌సిరీస్‌లోనూ ఆమె నటించనున్నారు.