Gaami: విశ్వక్‌ సేన్‌ ‘గామి’ సెన్సార్‌ రిపోర్టు.. రన్‌టైమ్‌ ఎంతంటే?

ఇంటర్నెట్‌ డెస్క్‌: విశ్వక్‌ సేన్‌ (Vishwak sen) హీరోగా రూపొందిన తాజా చిత్రం ‘గామి’ (Gaami). విద్యాధర్‌ కాగిత ఈ మూవీతో దర్శకుడిగా పరిచయం అవుతున్నారు. చాందినీ చౌదరి కథానాయిక. ఫస్ట్‌లుక్‌ పోస్టర్‌తోనే ఆసక్తి కలిగించిన ఈ చిత్రంలో విశ్వక్‌ అఘోరాగా కనిపించనున్నారు. మార్చి 8న విడుదలకు సిద్ధమైన ఈ చిత్రం సెన్సార్‌ పూర్తి చేసుకుంది. సెన్సార్‌ బోర్డు ఈ చిత్రానికి ‘ఏ’ సర్టిఫికెట్‌ ఇచ్చినట్లు తెలుపుతూ నిర్మాణ సంస్థ పోస్టర్‌ను విడుదల చేసింది. రన్‌టైమ్‌ 2:26 నిమిషాలు ఉంటుందని సినీ వర్గాల సమాచారం. ఈ ట్రైలర్‌పై ప్రభాస్‌ తన అభిప్రాయాన్ని వ్యక్తం చేయడంతో ఈ సినిమాపై ప్రేక్షకుల్లో అంచనాలు రెట్టింపు అయ్యాయి.

ఈ చిత్రం గురించి విశ్వక్ సేన్‌ ఓ సందర్భంలో మాట్లాడుతూ..‘‘గామి’ని ప్రారంభించినప్పుడు నేనెవరో మీకు తెలియదు. నా కెరీర్‌ తొలి నాళ్లలో మొదలుపెట్టిన సినిమా ఇది. నా నుంచి మీరు కోరుకునే మాస్‌ డైలాగ్స్‌, ఉర్రూతలూగించే పాటలు, ఫైట్లు ఇందులో ఉండవు. కానీ, వాటికి ఎంత ఎంజాయ్‌ చేస్తారో ఈ కథకూ అంతే ఎంజాయ్‌ చేస్తారు’ అని హామీ ఇచ్చారు. ఇందులో తన పాత్ర చాలా భిన్నంగా ఉంటుందన్నారు. హిమాలయాలు, వారణాసి వంటి ప్రాంతాల్లో షూట్‌ చేశామన్నారు. కథ విషయంలో దర్శకుడు ఎంతో స్పష్టంగా ఉన్నారని తెలిపారు.