పుణెలో బాబాయ్‌ భోజనానికి వచ్చారంతే: అజిత్‌ పవార్‌

ముంబయి: ఎన్సీపీ అధినేత శరద్‌పవార్‌తో ఇటీవల పుణెలో తాను సమావేశమవటం అతి సాధారణమైనదేనని, దాని గురించి పెద్దగా ఆలోచించాల్సిన అవసరం లేదని మహారాష్ట్ర ఉప ముఖ్యమంత్రి అజిత్‌ పవార్‌ తెలిపారు. ఆ భేటీపై ఇప్పటికే శరద్‌ పవార్‌ కూడా స్పష్టత ఇచ్చారన్నారు. కొల్హాపుర్‌లో మంగళవారం మీడియాతో అజిత్‌ మాట్లాడారు. ‘భేటీ అనంతరం కారులో రహస్యంగా ఎందుకు వెళ్లారు?’ అని విలేఖరులు ప్రశ్నించగా.. ఆ కారులో తాను లేనని అజిత్‌ పవార్‌ చెప్పారు. అతుల్‌ కుటుంబంతో తమకు రెండు తరాల నుంచి మంచి సంబంధాలున్నాయని, శరద్‌పవార్‌ను శనివారం ఆయన భోజనానికి ఆహ్వానించారన్నారు. చాందినీ చౌక్‌ వంతెన ప్రారంభోత్సవ కార్యక్రమాన్ని పూర్తిచేసుకున్న తర్వాత తాను కూడా అక్కడికి వెళ్లినట్లు అజిత్‌ వివరించారు.