IND vs ENG: ఈసారి భారత్‌ విజేతగా నిలవాలి.. జడ్డూ నిబద్ధతగల క్రికెటర్: రివాబా

ఇంటర్నెట్ డెస్క్‌: వరల్డ్‌ కప్‌లో (ODI World Cup 2023) లఖ్‌నవూ వేదికగా ఇంగ్లాండ్‌ను ఢీకొట్టేందుకు టీమ్‌ఇండియా (IND vs ENG) సమాయత్తమవుతోంది. ఇప్పటికే భారత ఆటగాళ్లు ప్రాక్టీస్‌ను ముమ్మరంగా చేసేస్తున్నారు. ఈ క్రమంలో భారత్ విజయం సాధించాలని కోరుతూ స్టార్ ఆల్‌రౌండర్‌ రవీంద్ర జడేజా (Ravindra Jadeja) సతీమణి రివాబా ప్రత్యేకంగా స్పందించారు. టీమ్ఇండియా ఆటగాళ్లు, కోచింగ్‌ సిబ్బందిపై పూర్తి నమ్మకం ఉందని పేర్కొన్నారు. వరల్డ్‌ కప్‌ను భారత్‌ నెగ్గాలని ప్రార్థించినట్లు వెల్లడించారు.

‘‘భారత్‌ జట్టుకు, క్రికెట్ అభిమానులకు శుభాకాంక్షలు. టీమ్‌ఇండియా వరుసగా విజయాలు సాధిస్తూ ముందుకెళ్తోంది. ఈసారి తప్పకుండా విశ్వవిజేతగా నిలవాలని కోరుకుంటున్నా. గత 20 ఏళ్ల రికార్డును కివీస్‌పై బద్దలు కొట్టడం ఆనందంగా ఉంది. ఇదే క్రమంలో ఇంగ్లాండ్‌పైనా ఘన విజయం సాధించాలి. రవీంద్ర జడేజా బ్యాటింగ్‌కు వచ్చినప్పుడు చాలా ఒత్తిడి ఉంటుంది. అతడి అనుభవంతో జట్టును గెలిపించేందుకు తీవ్రంగా ప్రయత్నిస్తాడు. జట్టుపట్ల, కోచింగ్‌ పట్ల ఎంతో నిబద్ధత కలిగిన ఆటగాడు’’ అని రివాబా వ్యాఖ్యానించారు. సీనియర్ ఆటగాడైన రవీంద్ర జడేజా బ్యాటింగ్‌, బౌలింగ్‌తోపాటు ఫీల్డర్‌గానూ టీమ్‌ఇండియాలో కీలక పాత్ర పోషిస్తున్నాడు. 

వరల్డ్‌కప్‌లో భారత్‌ ఐదు విజయాలు సాధించి 10 పాయింట్లతో రెండో స్థానంలో కొనసాగుతోంది. ఇంగ్లాండ్‌పైనా గెలిస్తే దాదాపు సెమీస్‌ చేరుకోవడం ఖాయం. మరోవైపు ఇంగ్లాండ్‌ ఇప్పటికే సెమీస్‌ రేసు నుంచి నిష్క్రమించింది. ఇప్పటి వరకు ఆడిన ఐదు మ్యాచుల్లో నాలుగింట్లో ఓడిపోయింది. డిఫెండింగ్ ఛాంపియన్‌గా బరిలోకి దిగిన ఇంగ్లాండ్‌కు అనూహ్య ఫలితాలు ఎదురు కావడం గమనార్హం.