అంజు, హర్షితలకు రజతాలు

బిష్కెక్‌ (కిర్గిస్తాన్‌): ఆసియా ఛాంపియన్‌షిప్‌లో భారత రెజ్లర్లు అంజు (53కేజీ), హర్షిత రజతాలు సాధించారు. సెమీస్‌లో 9-6తో చున్‌ లీ (చైనా)పై గెలిచిన అంజు.. ఫైనల్లో పేలవ ప్రదర్శన చేసింది. జి హ్యాంగ్‌ కిమ్‌ (కొరియా)తో పోరులో ఆమె ఒక్క పాయింట్‌ కూడా సాధించలేకపోయింది. అంజు టెక్నికల్‌ సుపీరియారిటీతో ఓడిపోయింది. మరోవైపు హర్షిత (72 కేజీ) ఫైనల్లో 2-5తో కియాన్‌ జియాంగ్‌ (చైనా) చేతిలో పరాజయంపాలైంది. ఫైనల్‌ చేరే క్రమంలో మూడు పాయింట్లు మాత్రమే ఇచ్చిన హర్షిత.. టైటిల్‌ పోరులో ఆ స్థాయి ప్రదర్శన చేయలేకపోయింది. 2021 ప్రపంచ ఛాంపియన్‌షిప్‌ పతక విజేత సరిత మోర్‌ రిక్తహస్తాలతో వెనుదిరిగింది. 57 కేజీల క్వార్టర్స్‌లో ఆమె 4-8తో గాంటుయా ఎంఖ్‌బత్‌ (మంగోలియా) చేతిలో ఓడింది.