Medaram: మేడారం భక్తులకు ఉపశమనం

నేటి నుంచి 29 వరకు పర్యావరణ రుసుం నిలిపివేత
‘ఈనాడు’ కథనానికి స్పందించిన మంత్రి కొండా సురేఖ

ఈనాడు డిజిటల్‌, జయశంకర్‌ భూపాలపల్లి: మేడారం తరలివస్తున్న భక్తులకు ఉపశమనం లభించింది. టోల్‌, పర్యావరణ, పార్కింగ్‌ రుసుముల భారంపై గురువారం ‘ఈనాడు’ ప్రధాన సంచికలో ‘మేడారం దారిలో బాదుడే బాదుడు’ శీర్షికతో కథనం ప్రచురితమైంది. ఈ కథనానికి అటవీ పర్యావరణ, దేవాదాయశాఖ మంత్రి కొండా సురేఖ స్పందించారు. ఏటూరునాగారం అభయారణ్యం పరిధిలో పస్రా, తాడ్వాయి, ఏటూరునాగారం నుంచి వచ్చే వాహనాలకు పర్యావరణ రుసుం నుంచి మినహాయింపు ఇస్తున్నట్లు ఆమె ప్రకటించారు. ఈ నెల 2 నుంచి 29వ తేదీ వరకు పర్యావరణ రుసుం (ఎన్విరాన్‌మెంట్‌ ఇంపాక్ట్‌ ఫీజు) వసూలును నిలిపివేస్తున్నట్లు చీఫ్‌ వైల్డ్‌ లైఫ్‌ వార్డెన్‌ ఉత్తర్వులు జారీ చేశారు. ఇందుకోసం ములుగు జిల్లా అటవీశాఖ అధికారి తక్షణమే చర్యలు తీసుకోవాలని ఉత్తర్వుల్లో పేర్కొన్నారు.