లక్ష్మీ పంపుహౌస్‌ విద్యుత్తు బకాయిలు రూ.477.34 కోట్లు

కాళేశ్వరం, న్యూస్‌టుడే: కాళేశ్వరం ప్రాజెక్టులోని లక్ష్మీ పంపుహౌస్‌ విద్యుత్తు బకాయి పెరుగుతూ వస్తోంది. 2019లో నాటి సీఎం కేసీఆర్‌ లక్ష్మీ పంపుహౌస్‌ను ప్రారంభించగా 2022 జులై వరకు గోదావరి జలాలను ఎత్తిపోశారు. అప్పటికే కోట్ల రూపాయలు దాటిన విద్యుత్తు బిల్లు మరింత పెరుగుతూ వచ్చింది. 2024 ఏప్రిల్‌ నెలకు సంబంధించి రూ.6.02 కోట్ల బిల్లు రాగా.. దీంతో కలిపి 2019 నుంచి ఈ ఏడాది ఏప్రిల్‌ వరకు రూ.477.34 కోట్లను ట్రాన్స్‌కోకు చెల్లించాల్సి ఉంది. 2022 జులై 14న భారీ వరదల కారణంగా పంపుహౌస్‌లోకి వరదనీరు చేరి 17 బాహుబలి మోటార్లను ముంచెత్తింది. అప్పటి నుంచి జలాల ఎత్తిపోతలు లేకున్నా నూతన మోటార్లు అమర్చే ప్రక్రియ, మరమ్మతులు, పంపుహౌస్‌ నిర్వహణ, మోటార్ల పరీక్షలు జరుగుతుండటంతో విద్యుత్తు బిల్లు ఈ మేరకు నమోదైనట్లు తెలుస్తోంది.