London: లండన్‌ లూటన్‌ ఎయిర్‌పోర్టులో అగ్నిప్రమాదం

కారు పార్కింగ్‌లో భారీగా మంటలు  
పదుల సంఖ్యలో విమానాల రద్దు

లండన్‌: కొత్తగా నిర్మించిన కారు పార్కింగ్‌లో సంభవించిన భారీ అగ్ని ప్రమాదంతో లండన్‌లోని లూటన్‌ విమానాశ్రయ ప్రయాణికులు తీవ్ర ఇబ్బందులకు గురయ్యారు. పదుల సంఖ్యలో విమానాలు రద్దయ్యాయి. దీంతో వేల మంది ప్రయాణికులు చిక్కుకుపోయారు. లూటన్‌ ఎయిర్‌పోర్టు సెంట్రల్‌ లండన్‌కు ఉత్తరాన 56 కిలోమీటర్ల దూరంలో ఉంది. ఇక్కడి నుంచి బ్రిటన్‌లోని వివిధ ప్రాంతాలతో పాటు ఐరోపా దేశాలకు చౌక ధరలో సేవలందించే విమానయాన సంస్థలు సర్వీసులను నడుపుతుంటాయి. మంగళవారం సాయంత్రం బహుళ అంతస్థుల పార్కింగ్‌ భవనంలోని ఎగువున నిలిపిన కారు నుంచి మొదలైన మంటలు వేగంగా మిగతా భాగాలకు విస్తరించాయి. పార్కింగ్‌ గ్యారేజి టెర్మినళ్లు రెండు పాక్షికంగా ధ్వంసమయ్యాయి. వందల సంఖ్యలో వాహనాలు దెబ్బతిన్నాయి. దట్టమైన పొగ కారణంగా ఆరుగురు అస్వస్థతకు గురయ్యారు. అగ్నిమాపక సిబ్బంది రంగంలోకి దిగి అతికష్టం మీద మంటలు అదుపులోకి తెచ్చారు. బుధవారం మధ్యాహ్నం 3 గంటల వరకు విమాన సర్వీసులను నిలిపివేసినట్లు అధికారులు తెలిపారు. ఎయిర్‌పోర్టును తాత్కాలికంగా మూసివేయడంతో చాలా మంది ప్రయాణికులు సమీపంలోని రైల్వే స్టేషన్‌లో నిరీక్షించాల్సి వచ్చింది. సాయంత్రం నుంచి ఎయిర్‌పోర్టు కార్యకలాపాలు ప్రారంభయ్యాయి. విమానాల రాకపోకలు మొదలయ్యాయి.