రైతులదీ, మూగ జీవాలదీ విడదీయలేని బంధం. అందుకే వారికి వ్యవసాయమంటే ఎంత ప్రాణమో... వారితోపాటు ఉండే పశువులన్నా మేకలన్నా అంతే అభిమానం ఉంటుంది. అలాంటి ఆప్యాయతనే చాటుకుంటున్నాడు తమిళనాడుకు చెందిన ఓ రైతు. తంజావూర్‌ జిల్లా కులమంగళం గ్రామానికి చెందిన డెబ్భై ఏళ్ల గణేశ్‌కి వ్యవసాయం అంటే చాలా ఇష్టం. ఒకవైపు సాగు చేస్తూనే పశువుల్నీ మేకల్నీ పెంచుతున్నాడు. అయితే ఒకసారి అడవికి తీసుకెళ్లిన మేకలు వర్షానికి తడిసి వణికిపోవడం గమనించిన గణేశ్‌ వాటికోసం ఏదైనా చేయాలనుకున్నాడు. ఖాళీగా పడి ఉన్న బియ్యం బస్తాలను కత్తిరించి వాటికి కొన్ని తాళ్లు కుట్టి- మేకలకు ఆ సంచుల్ని చుట్టి తాళ్లను ముడి వేస్తున్నాడు. అలా తన వద్ద ఉన్న యాభై మేకలకు చాలాకాలంగా వర్షాకాలం, చలికాలంలో ఇలా చలికోట్లు వేస్తున్నాడు గణేశ్‌. తనకు తోచిన ఆలోచనతో మూగ జీవాల పట్ల ప్రేమను చాటుకుంటున్న గణేశ్‌ని ఆ గ్రామస్తులంతా అభినందించడంతోపాటు మిగతా మేకల కాపర్లూ అదే దారిలో నడుస్తున్నారు.