రంగురంగుల రంగవల్లులూ, భోగి మంటలూ, భోగి పండ్లూ, హరిదాసుల సంకీర్తనలూ, గొబ్బెమ్మలూ, గంగిరెద్దులూ, గాలిపటాలూ, కోడి పందేలు... అన్నీ కలిస్తేనే పెద్ద పండుగ... అదే సంక్రాంతి. ఏడాది తొలినాళ్లలో పవిత్ర ధనుర్మాసంలో మూడు రోజుల పాటు అందరూ ఆనందోత్సాహాలతో జరుపుకునే పండుగ ఇది.

ఈ సందర్భంగా చాలా ప్రాంతాల్లో బొమ్మల కొలువునూ ఏర్పాటు చేస్తున్నారు. ముంగిట్లో ఓ పక్కన పల్లె సౌందర్యం, రైతుల శ్రమైక జీవితం, పండుగ విశేషాలకు అద్దంపట్టే అందమైన బొమ్మలను కొలువుతీర్చి- పిల్లలకు మన సంప్రదాయాలూ విలువలను చెప్పకనే చెబుతున్నారు. కొన్ని ప్రాంతాల్లో సాయంత్రం పూట బొమ్మల కొలువు ఏర్పాటు చేసి, నైవేద్యంగా పిండి వంటలు పెట్టి వాయినాలు ఇచ్చుకోవడం ఆనవాయితీ. కేవలం దసరా పండుగ సమయంలోనే కనిపించే బొమ్మల వేడుకలు ఇప్పుడు పల్లె శోభను సంతరించుకుని సంక్రాంతి సంబరాలకు కొత్త కళను తీసుకొస్తున్నాయి.