Yerragondapalem: చంద్రబాబుపై రాళ్ల దాడి.. ఆ మూడో వ్యక్తి ఎవరు?

దాడిలో గాయాలయ్యాయంటూ హడావుడి
ఐ-ప్యాక్‌ బృందం సభ్యుడేనని తెదేపా ఆరోపణ

ఒంగోలు నేరవిభాగం, న్యూస్‌టుడే: ‘చంద్రబాబు పర్యటన సందర్భంగా చోటుచేసుకున్న రాళ్ల దాడిలో ముగ్గురికి గాయాలయ్యాయి. వీరిలో ఒకరు జడ్పీ కో-ఆప్షన్‌ సభ్యుడు, ఇంకొకరు కంభంపాడు సర్పంచితో పాటు ‘మరో వ్యక్తి’ ఉన్నారు..’

- ఇవీ మంత్రి ఆదిమూలపు సురేష్‌ యర్రగొండపాలెంలో శనివారం విలేకర్లతో చెప్పిన మాటలు.

ఆ ‘మూడో వ్యక్తి’ ఎవరనే ప్రశ్న ఇప్పుడు వస్తోంది. అతని చిత్రాలను గానీ, పేరు గానీ వైకాపా నాయకులు బయటపెట్టలేదు. తెదేపా అధినేత చంద్రబాబు ప్రకాశం జిల్లా యర్రగొండపాలెంలో ఈ నెల 21న పర్యటించారు. ఈ సందర్భంగా వైకాపా శ్రేణులు ఆయనపై రాళ్లదాడికి పాల్పడ్డాయి. ఈ ఆందోళనలో ఓ యువకుడు పాల్గొన్నప్పటి చిత్రాలు, వీడియోలు ఇప్పుడు సామాజిక మాధ్యమాల్లో చక్కర్లు కొడుతున్నాయి. తెదేపా అధినేత పట్టణంలోకి ప్రవేశించడానికి ముందు రహదారిపై మంత్రి సురేష్‌ ఆందోళన చేశారు. ఆ సమయంలో ఓ యువకుడు ఆయన పక్కనే ఉండి.. మాట్లాడుతూ, సంకేతాలిస్తున్న దృశ్యాలు వీడియోలో ఉన్నాయి. దీంతో ఆ ‘మరో వ్యక్తి’ ఎవరనే ప్రశ్న రేకెత్తుతోంది. అతడు ఐ-ప్యాక్‌ సభ్యుడని తెదేపా నాయకులు ఆరోపిస్తున్నారు. అతడి ప్రణాళిక ప్రకారమే తెదేపా కార్యకర్తలను రెచ్చగొట్టేలా రాళ్లదాడికి పాల్పడ్డారనే ఆరోపణలు వినిపిస్తున్నాయి.

ఐ ప్యాక్‌కు చెందిన ఆ యువకుడికి కూడా చిన్నపాటి గాయం కావడంతో మంత్రి క్యాంపు కార్యాలయం లోనికి తీసుకెళ్లి తొలుత చికిత్స అందించినట్టు సమాచారం. ఇందుకుగాను 108 వాహనాన్ని, ఒక ప్రభుత్వ వైద్యుడిని పిలిపించారు. ఆ సమయంలో ముఖ్యనాయకులు మినహా ఇతరులెవరినీ గదిలోకి అనుమతించలేదు. అనంతరం అతని పేరు ఎక్కడా రాలేదు, ఎవరూ ప్రస్తావించలేదు. ‘ఆ మూడో వ్యక్తి’ ఎవరనే విషయాన్ని వైకాపా నాయకులు కూడా గోప్యంగా ఉంచారు. దీంతో పక్కా ప్రణాళికతోనే చంద్రబాబుపై రాళ్లదాడి జరిగిందనే విమర్శలకు ఈ అంశం బలం చేకూరుస్తోంది. ఐ-ప్యాక్‌కు చెందిన దాదాపు ఆరుగురు సభ్యులు చంద్రబాబు పర్యటనకు రెండు రోజుల ముందు నుంచే యర్రగొండపాలెంలో తిష్ఠ వేసినట్టు తెదేపా నాయకులు ఆరోపిస్తున్నారు.