నేడు తెలంగాణ రాష్ట్ర అవతరణ దినోత్సవం

సచివాలయంలో జాతీయజెండా ఎగురవేయనున్న సీఎం కేసీఆర్‌

ఈనాడు, హైదరాబాద్‌: తెలంగాణ రాష్ట్ర అవతరణ దినోత్సవం రాష్ట్రవ్యాప్తంగా శుక్రవారం వైభవంగా జరగనుంది. దశాబ్ది ఉత్సవాలను ముఖ్యమంత్రి కేసీఆర్‌ సచివాలయంలో ప్రారంభించనున్నారు. తొలుత గన్‌పార్క్‌లోని అమరవీరుల స్తూపం వద్ద సీఎం నివాళులర్పిస్తారు. అనంతరం డాక్టర్‌ బీఆర్‌ అంబేడ్కర్‌ తెలంగాణ సచివాలయం ప్రాంగణంలో జాతీయ పతాకావిష్కరణ చేసి, దశాబ్ది ఉత్సవ సందేశం ఇస్తారు. రాష్ట్రవ్యాప్తంగా కార్యక్రమాలు కొనసాగుతాయి. 21 రోజుల పాటు జరిగే దశాబ్ది ఉత్సవాల్లో వివిధ రంగాల్లో రాష్ట్రప్రగతిని వివరిస్తారు. వివిధ అభివృద్ధి కార్యక్రమాలకు ప్రారంభోత్సవాలు, శంకుస్థాపనలు ఉంటాయి. ఉత్సవాలను పురస్కరించుకొని సచివాలయం, శాసనసభ, మండలి, బీఆర్‌కే భవన్‌, ఇతర ప్రభుత్వ కార్యాలయాలు, భవనాలను విద్యుత్‌దీపాలతో అలంకరించారు. కాంగ్రెస్‌, భాజపా ఆధ్వర్యంలోనూ రాష్ట్ర అవతరణ వేడుకలు జరగనున్నాయి. రాజ్‌భవన్‌లో నిర్వహించే వేడుకల్లో గవర్నర్‌ తమిళిసై పాల్గొంటారు.