విజయవాడ-చెన్నై మధ్య వందేభారత్‌ పరుగులు ఎప్పుడు?

ఈనాడు, అమరావతి, చెన్నై: విజయవాడ-చెన్నై మధ్య వందేభారత్‌ రైలు ఎప్పటి నుంచి పరుగులు పెడుతుందనేది ప్రశ్నార్థకంగా మారింది. జులై 7న దేశవ్యాప్తంగా 5 వందేభారత్‌ రైళ్లను వర్చువల్‌గా ప్రధాని ప్రారంభించే సమయంలో ఈ రైలూ అందులో ఉందని అప్పట్లో రైల్వేశాఖ అధికారులు పేర్కొన్నారు. దీనికి 20687/88 నంబరూ కేటాయించారు. చివరకు రైలు ప్రారంభం వాయిదా వేశారు. ఎప్పుడు పట్టాలెక్కుతుందో అధికారులు స్పష్టత ఇవ్వలేకపోతున్నారు. ఈ రైలును తొలుత చెన్నై కేంద్రంగా ఉండే దక్షిణ రైల్వే.. చెన్నై సెంట్రల్‌-తిరుపతి మధ్య నడపాలని భావించింది. రెండు స్టేషన్ల మధ్య దూరం తక్కువ కావడంతో.. చెన్నై-తిరుపతి-విజయవాడ మధ్య నడపాలని దక్షిణ మధ్య రైల్వే జోన్‌ కోరింది. అలాగే రైలు ఎవరు నిర్వహిస్తారనేది తేలలేదు. ఈ మార్గం.. దక్షిణ రైల్వే జోన్‌ పరిధిలో తక్కువ, దక్షిణ మధ్య రైల్వే జోన్‌ (సికింద్రాబాద్‌)లో ఎక్కువగా ఉంది. ఈ రైలుతో తమ జోన్‌ పరిధిలో వచ్చే కొద్దిపాటి రాబడితో నిర్వహణ సాధ్యం కాదని దక్షిణ రైల్వే చెబుతున్నట్లు తెలిసింది. ఈ నేపథ్యంలో నిర్వహణను దక్షిణ మధ్య రైల్వే జోన్‌కు కేటాయించి, విజయవాడ డివిజన్‌కు అప్పగిస్తారా? అనేది తేలాల్సి ఉందని రైల్వే వర్గాలు చెబుతున్నాయి.