Air India: ఎయిరిండియాపై డీజీసీఏ చర్యలు..!

దిల్లీ: ప్రయాణికుల భద్రత విషయంలో రాజీపడే ప్రసక్తే లేదని తేల్చి చెబుతూ.. ఎయిరిండియా (Air India)కు డీజీసీఏ (DGCA) కఠిన సందేశం పంపింది. ఈ విషయంలో కొన్ని లోపాలను గుర్తించి ఎయిరిండియా (Air India) భద్రతా విభాగాధిపతిపై నెలరోజుల పాటు సస్పెన్షన్‌ వేటు వేసింది.

జులై 25-26 మధ్య ఎయిరిండియా (Air India)లో తనిఖీలు నిర్వహించినట్లు డీజీసీఏ (DGCA) తెలిపింది. అంతర్గత ఆడిట్‌, ప్రమాద నివారణ, తగినంత మంది సాంకేతిక నిపుణులు వంటి అంశాల్లో ఎయిరిండియా ఏ మేరకు నిబంధనలు పాటిస్తుందో పరిశీలించినట్లు పేర్కొంది. ప్రమాదాల నివారణ విషయంలో కొన్ని లోపాలను గుర్తించింది. అలాగే సాంకేతిక నిపుణుల సంఖ్య సైతం నిబంధనలకు అనుగుణంగా లేదని వెల్లడించింది. మరోవైపు అంతర్గతంగా కంపెనీ చేపట్టాల్సిన కొన్ని తనిఖీల్లో కూడా బాధ్యతారాహిత్యంగా వ్యవహరించినట్లు గమనించింది. దీనిపై కంపెనీకి షోకాజ్‌ నోటీసులు జారీ చేసినట్లు తెలిపింది.

నోటీసులపై ఎయిరిండియా (Air India)లోని ఆయా విభాగాధిపతులు స్పందించినట్లు డీజీసీఏ (DGCA) వెల్లడించింది. వాటిని సమీక్షించిన తర్వాత ఎయిరిండియా సేఫ్టీ చీఫ్‌పై నెలరోజుల పాటు సస్పెన్షన్‌ వేటు వేసినట్లు పేర్కొంది. ప్రయాణికుల భద్రతకు డీజీసీఏ అత్యంత ప్రాధాన్యం ఇస్తోందని పౌరవిమానయాన శాఖ మంత్రి జ్యోతిరాధిత్య సింధియా గత ఏడాది ఓ సందర్భంలో తెలిపారు. ఈ విషయంలో రాజీపడే ప్రసక్తే లేదని తేల్చి చెప్పారు.