Reliance Industries: వార్తల్లో తరచూ కనిపించే కంపెనీ రిలయన్స్‌

ఆ తర్వాతి స్థానాల్లో ఎస్‌బీఐ, హెచ్‌డీఎఫ్‌సీ బ్యాంక్‌
విజికీస్‌ న్యూస్‌ స్కోర్‌ నివేదిక

దిల్లీ: ఆదాయాలు, లాభాలు, మార్కెట్‌ విలువ పరంగా.. మన దేశంలో అతిపెద్ద కార్పొరేట్‌ కంపెనీ అయిన రిలయన్స్‌ ఇండస్ట్రీస్‌.. ప్రసార మాధ్యమాల్లో (మీడియా) అత్యంత ఎక్కువగా కనిపించే కంపెనీల్లోనూ అగ్రస్థానంలో నిలిచింది. ‘2023 విజికీస్‌ న్యూస్‌ స్కోర్‌ నివేదిక’ ఈ విషయాన్ని వెల్లడించింది. స్టేట్‌ బ్యాంక్‌ ఆఫ్‌ ఇండియా (ఎస్‌బీఐ), హెచ్‌డీఎఫ్‌సీ బ్యాంక్‌, ఐసీఐసీఐ బ్యాంక్‌, భారతీ ఎయిర్‌టెల్‌ ఆ తర్వాతి స్థానాల్లో నిలిచాయి. విజికీస్‌ న్యూస్‌ స్కోర్‌ను.. వార్తల పరిమాణం, పతాక శీర్షికల ప్రాధాన్యం, పబ్లికేషన్ల సర్క్యులేషన్‌, పాఠకుల సంఖ్య ద్వారా గణిస్తారు. వార్తల్లో తరచు కనిపించే అంశాన్ని లెక్కించే పరామితి అయిన ఈ స్కోరును తొలిసారిగా తీసుకొచ్చినప్పటి నుంచీ అంటే నాలుగేళ్లుగా రిలయన్స్‌ ఇండస్ట్రీస్‌ అగ్రస్థానంలో కొనసాగుతోంది. ఏటా స్కోరును మెరుగుపరచుకుంటూనే ఉంది.

• 2023లో రిలయన్స్‌ ఇండస్ట్రీస్‌ 96.46 స్కోరును సాధించింది. 2022లో 92.56, 2021లో 84.9 స్కోరు ఈ కంపెనీకి లభించింది. నెలవారీ విశ్లేషణ చూస్తే 2023 జూన్‌ నుంచి నవంబరు మధ్య 3 నెలల పాటు 98కి పైగా స్కోరును సంస్థ సాధించింది.
• రిలయన్స్‌ 2023లో సాధించిన స్కోరు ఆ కంపెనీకి సంబంధించిన అన్ని వార్తలను చదివిన ఏకీకృత పాఠకుల సంఖ్య (7,400 కోట్లు) ఆధారంగా లభించింది.
• ఎస్‌బీఐ 85.81 స్కోరు (4,690 కోట్ల మంది పాఠకుల)ను సాధించగా, హెచ్‌డీఎఫ్‌సీ బ్యాంక్‌ 84.06 (4,240 కోట్ల పాఠకులు), ఐసీఐసీఐ బ్యాంక్‌ 81.9 (4,220 కోట్ల మంది), భారతీ ఎయిర్‌టెల్‌ 80.64 (4,030 కోట్ల పాఠకుల) స్కోరును దక్కించున్నాయి.
• రిలయన్స్‌కున్న ప్రజా సంబంధాల(పీఆర్‌) సామర్థ్యం వల్లే మిగతా సంస్థలతో పోలిస్తే అందనంత దూరంలో ఉందని విజికీస్‌ పరిశోధన చెబుతోంది. రిలయన్స్‌  ఇండస్ట్రీస్‌కు, రెండో స్థానంలో ఉన్న ఎస్‌బీఐకు భారీ అంతరం ఉండడానికి ఇదే ప్రధాన కారణం.