హ్యాపియెస్ట్‌ మైండ్స్‌ డివిడెండ్‌ 163%

దిల్లీ: ఐటీ సంస్థ హ్యాపియెస్ట్‌ మైండ్స్‌ టెక్నాలజీస్‌ గత ఆర్థిక సంవత్సరం మార్చి త్రైమాసికంలో రూ.71.98 కోట్ల ఏకీకృత నికర లాభాన్ని నమోదు చేసింది. 2022-23 ఇదే కాల లాభం రూ.57.66 కోట్లతో పోలిస్తే ఇది 24.83% అధికం. కార్యకలాపాల ఆదాయం రూ.377.98 కోట్ల నుంచి 10.4% పెరిగి రూ.417.29 కోట్లకు చేరింది. ఇందులో ఎడ్యుటెక్‌ విభాగ ఆదాయ వాటా 22.3%, ఆరోగ్య సంరక్షణ వాటా 16.1 శాతంగా నమోదయ్యాయి.

2031 ఆర్థిక సంవత్సరం నాటికి 1 బిలియన్‌ డాలర్ల (సుమారు రూ.8,300 కోట్ల) దీర్ఘకాలిక లక్ష్యంతో జెన్‌ ఏఐ (కృత్రిమమేధ) వ్యాపార యూనిట్‌ను కొత్తగా సృష్టించామని కంపెనీ ఎగ్జిక్యూటివ్‌ ఛైర్మన్‌ అశోక్‌ సూతా వెల్లడించారు. రెండు సంస్థల కొనుగోలు ప్రక్రియను విజయవంతంగా పూర్తి చేసినట్లు తెలిపారు.

•  2023-24 పూర్తి ఆర్థిక సంవత్సరానికి లాభం రూ.248.39 కోట్లకు చేరింది. 2022-23 లాభం రూ.230.99 కోట్లతో పోలిస్తే ఇది 7.53% అధికం. ఇదే సమయంలో ఆదాయం రూ.1,429.29 కోట్ల నుంచి 13.66% పెరిగి రూ.1,624.66 కోట్లకు చేరింది. స్థిర కరెన్సీ రూపేణా గత ఆర్థిక సంవత్సరంలో ఆదాయ వృద్ధి 11%, ఎబిటా వృద్ధి 24.6 శాతంగా నమోదయ్యాయి. ప్యూర్‌సాఫ్ట్‌వేర్‌ టెక్నాలజీస్‌, మ్యాక్‌మిల్లన్‌ లెర్నింగ్‌ సంస్థలను కొనుగోలు చేసినందున, మా వృద్ధికి దోహదం చేయనున్నాయని సంస్థ ఎండీ, సీఎఫ్‌ఓ వెంకట్రామన్‌ నారాయణన్‌ వెల్లడించారు.
•  2024-25లో 35-40% వృద్ధిని అంచనా వేస్తున్నట్లు తెలిపారు. 2024 మార్చి 31 నాటికి కంపెనీలో 5,168 మంది పని చేస్తున్నారు. వలసల రేటు 13 శాతంగా ఉంది. రూ.2 ముఖ విలువ కలిగిన ఒక్కో ఈక్విటీ షేరుకు రూ.3.25 (163%) చొప్పున తుది డివిడెండ్‌ను కంపెనీ బోర్డు ప్రతిపాదించింది.