ఏప్రిల్‌లో శాకాహారం 8% ప్రియం

మాంసాహారం ధర తగ్గింది
‘రోటీ రైస్‌ రేట్‌’ నివేదిక

ముంబయి: ఉల్లిపాయలు, టమోటాల ధరలు పెరగడంతో గత నెలలో వెజిటేరియన్‌ (శాకాహార) థాలీ సగటు ధర సుమారు 8% పెరిగిందని క్రిసిల్‌ మార్కెట్‌ ఇంటెలిజెన్స్‌ అండ్‌ అనాలసిస్‌ నెలవారీ ‘రోటీ రైస్‌ రేట్‌’ నివేదిక వెల్లడించింది. అయితే నాన్‌-వెజిటేరియన్‌ (మాంసాహార) భోజనం ధర తగ్గిందని పేర్కొంది. బ్రాయిలర్‌ కోడిమాంసం ధరలు తగ్గడమే ఇందుకు కారణం.

• రోటీ, కూరగాయలు (టమోటాలు, ఉల్లిపాయలు, బంగాళాదుంపలు), అన్నం, పప్పు, పెరుగు, సలాడ్‌తో కూడిన వెజ్‌ థాలీ సగటు ధర 2023 ఏప్రిల్‌లో రూ.25.4 ఉండగా, ఈ ఏడాది ఏప్రిల్‌లో రూ.27.4కు చేరింది. ఈ ఏడాది మార్చి నాటి రూ.27.3తో పోల్చినా స్వల్పంగా పెరిగింది. ఉల్లిపాయల ధర 41%, టమోటాలు 40%, బంగాళాదుంపలు 38%, బియ్యం 14%, పప్పులు 20% ప్రియమవ్వడమే ఇందుకు నేపథ్యం. అయితే జీలకర్ర, మిరప, వంటనూనెల ధర వరుసగా 40%, 31%, 10% తగ్గడంతో వెజ్‌ థాలీ ధర మరీ ఎక్కువ పెరగలేదు.
• నాన్‌-వెజ్‌ థాలీలో పప్పు స్థానంలో చికెన్‌ ఉంటుంది. గత నెలలో దీని సగటు ధర రూ.56.3గా నమోదైంది. 2023 ఏప్రిల్‌లో ఇది రూ.58.9గా ఉంది. ఈ ఏడాది మార్చి నాటి రూ.54.9తో పోలిస్తే మాత్రం ఏప్రిల్‌లో ధర పెరిగింది. బ్రాయిలర్‌ ధర 12% తగ్గడంతో (50% వెయిటేజీ దీనిదే) నాన్‌-వెజ్‌ థాలీ ధర వార్షిక ప్రాతిపదికన తగ్గింది. బ్రాయిలర్‌ ధర 4% పెరగడంతో,  ఈ ఏడాది మార్చి కంటే ఏప్రిల్‌లో నాన్‌వెజ్‌ థాలీ ధర 3% పెరిగిందని నివేదిక తెలిపింది.