‘కొవిషీల్డ్‌’ టీకాను వెనక్కి తీసుకుంటున్న ఆస్ట్ర జెనేకా

దిల్లీ: పలు రకాల దుష్ఫలితాలు కనిపిస్తున్నాయనే ఆరోపణలు వెల్లువెత్తుతున్న నేపథ్యంలో, మార్కెట్లో ఉన్న కొవిడ్‌-19 టీకాను వెనక్కి తీసుకోవాలని యూకే  కంపెనీ ఆస్ట్రజెనేకా నిర్ణయించింది. ఈ టీకాను ‘కొవిషీల్డ్‌’ పేరుతో మనదేశంలో సీరమ్‌ ఇన్‌స్టిట్యూట్‌ ఆఫ్‌ ఇండియా ఉత్పత్తి చేసి, మనదేశంతో పాటు ప్రపంచ వ్యాప్తంగా వివిధ దేశాలకు పంపిణీ చేసింది. ఈ టీకా తీసుకున్న కొందరిలో రక్తం గడ్డ కట్టడం, ప్లేట్‌లెట్లు తగ్గిపోవడం వంటి ఇబ్బందులు తలెత్తినట్లు ఇటీవల వెలుగులోకి వచ్చింది. అంతర్జాతీయ విపణుల్లో కొన్ని టీకా డోసులు మిగిలిపోయినందున వాటిని వెనక్కి తీసుకుంటున్నట్లు ఆస్ట్ర జెనేకా వెల్లడించింది. కొవిడ్‌కు ఎన్నో రకాల టీకాలు మార్కెట్లో అందుబాటులోకి వచ్చినందున తమ టీకాకు (వాక్స్‌జెర్‌వ్రియా) డిమాండ్‌ తగ్గిందని పేర్కొంది. టీకా ఉత్పత్తి, సరఫరాలను ఇప్పటికే నిలిపి వేసినట్లు వివరించింది.