8% వృద్ధికే అధిక అవకాశం

2023-24పై సీఈఏ అంచనా

దిల్లీ: గత ఆర్థిక సంవత్సరానికి (2023-24) భారత జీడీపీ వృద్ధి 8 శాతంగా నమోదయ్యేందుకే అవకాశాలు ఎక్కువగా ఉన్నాయని ముఖ్య ఆర్థిక సలహాదారు (సీఈఏ) వి.అనంత నాగేశ్వరన్‌ తెలిపారు. మూడు త్రైమాసికాల్లో బలమైన వృద్ధి నమోదుకావడం ఇందుకు దోహదం చేస్తుందని ఆయన అభిప్రాయపడ్డారు. 2023-24 మొదటి త్రైమాసికంలో 7.8%, రెండో త్రైమాసికంలో 7.6%, మూడో త్రైమాసికంలో 8.4% వృద్ధి నమోదైన సంగతి తెలిసిందే. ‘2023-24కు 7.8% వృద్ధిని ఐఎంఎఫ్‌ అంచనా వేసింది. అయితే తొలి మూడు త్రైమాసికాల్లోని వృద్ధి రేటును పరిగణనలోకి తీసుకుంటే, పూర్తి ఆర్థిక సంవత్సరానికి 8% వృద్ధి రేటు నమోదయ్యే అవకాశాలు కాస్త ఎక్కువగానే కనిపిస్తున్నాయ’ని ఇక్కడ జరిగిన ఓ కార్యక్రమంలో మాట్లాడుతూ నాగేశ్వరన్‌ తెలిపారు. ఆర్‌బీఐ అంచనా వేసిన 7.5%  కంటే ఇది ఎక్కువ.

ప్రస్తుత ఆర్థిక సంవత్సరానికి భారత వృద్ధి రేటును ఐఎంఎఫ్‌ 6.8%, ఆర్‌బీఐ 7 శాతంగా అంచనా వేశాయి. ఆర్‌బీఐ అంచనానే నిజమైతే.. కొవిడ్‌-19 పరిణామాల తర్వాత అంటే 2021-22 నుంచి వరుసగా నాలుగు ఆర్థిక సంవత్సరాల్లో 7 శాతానికి మించి వృద్ధి రేటు నమోదైనట్లు అవుతుందని నాగేశ్వరన్‌ తెలిపారు. ఇది వాతావరణ పరిస్థితులపై ఎక్కువగా ఆధారపడి ఉంటుందని తెలిపారు. 2024-25 తర్వాత నుంచి భారత్‌ వృద్ధి రేటు 6.5- 7% మధ్య నమోదుకావచ్చని ఆయన విశ్లేషించారు. స్థిరాస్తి రంగం వైపు పెట్టుబడులు మళ్లిస్తుండటం వల్లే, ఆర్థిక పథకాల్లో కుటుంబాల పొదుపు తగ్గుతోందని తెలిపారు.