ఇకపై బ్యాంకుల్లోనూ మహిళా సమ్మాన్‌ సేవింగ్స్‌ సర్టిఫికెట్‌

ఇంటర్నెట్‌ డెస్క్‌: ఇప్పటి వరకు ‘మహిళా సమ్మాన్‌ సేవింగ్స్‌ సర్టిఫికెట్‌’ (mahila samman savings certificate) ఖాతాను పోస్టాఫీసుల్లో మాత్రమే తెరవడానికి మహిళలకు అవకాశం ఉండేది. ఇప్పుడు బ్యాంకుల ద్వారా కూడా ఈ పథకంలో చేరేందుకు కేంద్ర ప్రభుత్వం అవకాశం కల్పిస్తోంది. ఈ మేరకు నోటిఫికేషన్‌ జారీ చేసింది. ఇకపై అన్ని ప్రభుత్వ రంగ బ్యాంకుల్లోనూ ఈ పథకానికి దరఖాస్తు చేసుకోవచ్చు. అలాగే, ప్రైవేట్‌ బ్యాంకులైన ఐసీఐసీఐ బ్యాంక్‌, యాక్సిస్‌ బ్యాంక్‌, హెచ్‌డీఎఫ్‌సీ బ్యాంక్‌, ఐడీబీఐ బ్యాంకుల్లో కూడా ఈ స్కీమ్‌లో చేరడానికి మహిళలకు అవకాశం ఉంది.

మహిళా సమ్మాన్‌ సేవింగ్స్‌ స్కీమ్‌: ఎక్కువ మంది మహిళలు పెట్టుబడులు పెట్టేలా ప్రోత్సహించేందుకు కేంద్ర ప్రభుత్వం 2023 బడ్జెట్‌లో మహిళల కోసం వన్‌-టైమ్‌ సేవింగ్స్‌ స్కీం అయిన ‘మహిళా సమ్మాన్‌ సేవింగ్స్‌ సర్టిఫికెట్‌’ను ప్రవేశపెట్టింది. ఈ పథకంలో మహిళ తన కోసం లేదా మైనర్‌ బాలిక తరఫున సంరక్షకుడు ఖాతాను తెరవొచ్చు.

వడ్డీ: ఇది ప్రభుత్వ హామీ ఉన్న పథకం. దీనిపై 7.5% ఫిక్స్‌డ్‌ వడ్డీ రేటు లభిస్తుంది. మెచ్యూరిటీ సమయంలో డిపాజిట్‌ చేసిన మొత్తం, వడ్డీ కలిపి ఇస్తారు.

కాలవ్యవధి: ఈ స్కీమ్‌ కాలవ్యవధి రెండేళ్లు మాత్రమే. ఈ స్కీమ్‌ 2023, ఏప్రిల్‌ 1 నుంచి 2025 మార్చి 31 వరకు మాత్రమే మదుపు చేయడానికి అవకాశం ఉంది. డిపాజిట్‌ను 2 ఏళ్లు ఉంచితే, వడ్డీ కూడా 2 ఏళ్ల సమయానికి మాత్రమే చెల్లిస్తారు. మెచ్యూరిటీ అనంతరం కూడా డిపాజిట్‌ను ఈ స్కీమ్‌లో ఉంచేస్తే.. 2 ఏళ్ల తర్వాత కాలానికి పొదుపు ఖాతా వడ్డీ మాత్రమే దక్కుతుంది.

డిపాజిట్‌: ఈ పథకం కింద కనీస డిపాజిట్‌ రూ.1000, గరిష్ఠ పరిమితి రూ.2 లక్షలు. ఒకసారి రూ.2 లక్షల్లోపు డిపాజిట్‌ చేస్తే మళ్లీ డిపాజిట్‌ చేయడానికి 3 నెలలు వేచి ఉండాలి.

ఉపసంహరణ: ఖాతా తెరిచిన తేదీ నుంచి ఒక సంవత్సరం తర్వాత, అర్హత ఉన్న బ్యాలెన్స్‌లో 40% ఉపసంహరణకు ప్రభుత్వం అనుమతిస్తుంది.

మెచ్యూరిటీకి ముందే ఖాతాను క్లోజ్‌ చేయొచ్చు: ఖాతాదారుడు మరణించిన సందర్భంలో ఖాతాను ముందుగానే మూసేయొచ్చు. ఖాతాదారుడు తీవ్ర ప్రాణాపాయ స్థితిలో ఉన్నప్పుడు సంబంధిత పత్రాలను సమర్పించి ఖాతాను ముందుగానే క్లోజ్‌ చేయొచ్చు. ఇలాంటి సందర్భంలో డిపాజిట్‌, వడ్డీ కలిపి ఇచ్చేస్తారు. అయితే, ఖాతా తెరిచిన 6 నెలల తర్వాత ఎటువంటి కారణం చెప్పకుండా ఖాతాను మూసివేస్తే.. అప్పుడు వడ్డీపై 2% కోత విధిస్తారు. అంటే డిపాజిట్‌ మొత్తం 5.5% వడ్డీ మాత్రమే చెల్లిస్తారు.