Qualcomm: భారత్‌లో క్వాల్‌కామ్‌ మరో రూ.177 కోట్ల పెట్టుబడులు

దిల్లీ: ప్రముఖ ఎలక్ట్రానిక్‌ చిప్‌ల తయారీ సంస్థ క్వాల్‌కామ్‌ భారత్‌లో రూ.177 కోట్ల పెట్టుబడులు పెట్టనున్నట్లు ప్రకటించింది. ఈ మొత్తంతో చెన్నైలోని తమ తయారీ కేంద్రాన్ని కొత్త ‘డిజైన్‌ సెంటర్‌’తో విస్తరిస్తామని తెలిపింది. అదనంగా దాదాపు 1,600 మందికి ఉపాధి లభిస్తుందని పేర్కొంది. చెన్నైలో ఆదివారం జరిగిన ‘తమిళనాడు గ్లోబల్‌ ఇన్వెస్టర్స్‌ మీట్‌’లో ఈ ప్రకటన చేసింది.

కొత్త సెంటర్‌లో వై-ఫై సాంకేతికతలపై దృష్టి సారిస్తూ వైర్‌లెస్‌ కనెక్టివిటీ పరిష్కారాలను అభివృద్ధి చేయనున్నట్లు క్వాల్‌కామ్‌ తెలిపింది. 5జీ సాంకేతికత అభివృద్ధిలో తమ ‘అంతర్జాతీయ పరిశోధన, అభివృద్ధి కేంద్రాని’కీ ఈ కొత్త సెంటర్‌ తన వంతు సహకారం అందిస్తుందని వెల్లడించింది. వైర్‌లెస్‌ కమ్యూనికేషన్‌ పరిశ్రమలో ముందు వరుసలో ఉండాలన్న లక్ష్యానికి కట్టుబడి ఉన్నామని తెలిపింది.