Reliance: విగ్రహ ప్రాణప్రతిష్ఠ రోజున.. రిలయన్స్‌ ఉద్యోగులకు సెలవు

ముంబయి: అయోధ్య రామమందిరం(Ayodhya Ram Mandir) ప్రాణ ప్రతిష్ఠ కార్యక్రమం కోసం దేశమంతా ఎదురుచూస్తోంది. ఈ మహత్కార్యం వేళ.. జనవరి 22(సోమవారం)న సంస్థ ఉద్యోగులకు రిలయన్స్‌ ఇండస్ట్రీస్‌(Reliance Industries) సెలవు ప్రకటించింది. దేశవ్యాప్తంగా సేవలు అందిస్తోన్న సంస్థ సిబ్బందికి ఈ సెలవు వర్తించనుంది.

ఈ వేడుక దృష్ట్యా దేశవ్యాప్తంగా అన్ని కేంద్ర ప్రభుత్వ కార్యాలయాలు సగం రోజు మాత్రమే పనిచేయనున్న సంగతి తెలిసిందే. రామ్ లల్లా విగ్రహ ప్రాణప్రతిష్ఠ వేడుకలో ఉద్యోగులు పాల్గొనేందుకు వీలుగా.. ఆ రోజు మధ్యాహ్నం 2.30 గంటల వరకు కార్యాలయాలు మూసి ఉంటాయని కేంద్రం వెల్లడించింది. అలాగే ఉత్తర్‌ప్రదేశ్‌, హరియాణా, మధ్యప్రదేశ్‌, గోవా, మహారాష్ట్ర ప్రభుత్వాలు ఆ రోజు సెలవు ప్రకటించగా.. రాజస్థాన్‌, త్రిపుర, ఛత్తీస్‌గఢ్‌, అస్సాం, ఒడిశా సగం దినం సెలవు ఇచ్చాయి.

ప్రధాని మోదీ(Modi) చేతులమీదుగా వేద పండితులు, అర్చకులు ఈ ప్రాణప్రతిష్ఠ కార్యక్రమాన్ని నిర్వహించనున్నారు. తొలుత ప్రధాని మోదీ రాముడి విగ్రహాన్ని దర్శించుకోనున్నారు. ఇదిలాఉండగా.. ఈ వేడుకకు ఆహ్వానం అందిన జాబితాలో రిలయన్స్ ఇండస్ట్రీస్‌ ఛైర్మన్ ముకేశ్ అంబానీ(Mukesh Ambani)కుటుంబం కూడా ఉంది.