దేశీదారు.. తగ్గని జోరు

మద్యం గొలుసు దుకాణాల్లో విక్రయాలు

జైనథ్‌, న్యూస్‌టుడే

గుడుంబాను అరికట్టేందుకు రాష్ట్ర ప్రభుత్వం చర్యలు చేపట్టింది. దీంతో పలువురి వ్యాపారుల చూపు పెన్‌గంగ సరిహద్దు మహారాష్ట్రలో చౌక ధరకు లభ్యమయ్యే దేశీదారుపై పడింది. నది పరీవాహక గ్రామాలను అడ్డాగా చేసుకొని జిల్లాలో వ్యాపారులు దేశీదారు విక్రయాలు జోరుగా కొనసాగిస్తున్నారు. ఆబ్కారీ శాఖ అధికారులు ‘మామూలు’గా తీసుకోవడంతో గ్రామాల్లో మద్యం గొలుసు దుకాణాల్లోనే దేశీదారు విచ్చలవిడిగా అమ్ముతున్నారు.

జిల్లాలోని ఆయా గ్రామాల్లో వీడీసీల ఆధ్వర్యంలో గ్రామ జనాభాను బట్టి మద్యం గొలుసు దుకాణాలకు అనధికారికంగా టెండర్లు నిర్వహిస్తున్నారు. వ్యాపారులు ఈ దుకాణాల్లో దర్జాగా దేశీదారు అమ్మకాలు సైతం సాగిస్తున్నారు. జైనథ్‌ మండలంలోని గిమ్మ, పెండల్‌వాడ, కోర్ట, ఆకోలి, సాంగ్వి, భోరజ్‌, గూడ, సిర్సన్న, రాంపూర్‌, ఆనంద్‌పూర్‌, దీపాయిగూడ, కరంజి, బేల మండలంలోని సాంగిడి, బెదోడ, కొగ్దూర్‌, మాంగ్రూడ్‌, ఆదిలాబాద్‌ మండలం భీంసారి, తాంసి మండలంతో పాటు భీంపూర్‌ మండలంలోని కరంజి(బి), అర్లిటి, పిప్పల్‌కోటి, నిపాని, భీంపూర్‌, వడూర్‌, తలమడుగు మండలం లాల్‌గాడ, ఝరి, రుయ్యాడి తదితర గ్రామాల్లో వ్యాపారం నడిపిస్తున్నారు. గిమ్మ గ్రామంలోనైతే ఇళ్లలోనే వ్యాపారం సాగుతుండటం గమనార్హం.

లాభం ఎక్కువని..

తెలంగాణ మద్యం అమ్మితే లాభాలు అంతంత మాత్రమేనని, మహారాష్ట్రలోని చౌక మద్యం దేశీదారుని అమ్మకాలు సాగిస్తే లాభాలు ఎక్కువ వస్తాయని వ్యాపారులు ఈ దందాను ఎంచుకున్నారు. దేశీదారు ఒక్కో పెట్టె ధర రూ.3600 ఉంటుంది. ఒక్కో పెట్టెలో 48 సీసాలుంటాయి. ఒక్కో సీసా రూ.75 ఉండగా.. రూ.120 లకు విక్రయిస్తారు. ఈ మేరకు ఒక్కో పెట్టెకు రూ.5,760 వస్తాయి. ఖర్చులు పోను ఒక్కో పెట్టెకు రూ.1500 వరకు లాభం చేకూరుతుంది. ఆయా గ్రామాల్లో ఈ లెక్కన జిల్లాలో రోజుకి సుమారు 300 వరకు పెట్టెల చొప్పున అమ్మగా రూ.4.5 లక్షలు, నెలకు రూ.1.35 కోట్లు, ఏడాదికి రూ.16.20 కోట్లకు పై చిలుకు వ్యాపారం సాగుతోంది.

దేశీదారు అమ్మకాలు బాహాటంగా జరుగుతున్నా ఆబ్కారీ అధికారులు అడపాదడపా కేసులు నమోదు చేసి చేతులు దులుపుకొంటున్నారు. ముందస్తు సమాచారమిస్తేనే పట్టుకొని కేసులు నమోదు చేస్తున్నారు. అధికారుల అండదండలతోనే వ్యాపారులు ఇష్టారీతిన అమ్మకాలు సాగిస్తున్నారని, అందుకే దాడులు నిర్వహించడం లేదని ప్రజలు ఆరోపిస్తున్నారు.

పట్టించుకునే వారేరి?

తెలంగాణ, మహారాష్ట్ర సరిహద్దున గల పెన్‌గంగ పరీవాహక ప్రాంతం మీదుగా.. నిత్యం జిల్లాలో దేశీదారు దందా యథేచ్ఛగా సాగుతోంది. పట్టించుకునే వారు కరవవడంతో మహారాష్ట్రలోని భోరి, పిప్పల్‌కోఠి,ఫఫ చనాఖా మీదుగా 44వ జాతీయ రహదారి, పెన్‌గంగలో పడవ ద్వారా జైనథ్‌ మండలంలోని నది పరీవాహక గ్రామాలకు, తాంసి మండలంలోని పలు గ్రామాలకు భోరజ్‌ చెక్‌పోస్టు దాటి ఆదిలాబాద్‌కు, మహారాష్ట్రలోని దుర్బ మీదుగా పాటన్‌ గ్రామం ఆపై బేల మండలానికి తరలిస్తున్నారు.

చట్టపరమైన చర్యలు : నరసింహారెడ్డి, ఎక్సైజ్‌ డిప్యూటీ కమిషనర్‌

దేశీదారు విక్రయాలు సాగించిన వారిపై కఠిన చర్యలు తీసుకుంటాం. మా అధికారులు ఎప్పటికప్పుడు తనిఖీలు చేపడుతున్నారు. దేశీదారు అమ్మకాలు జరిపితే తమకు సమాచారం అందించాలి. వారి వివరాలు గోప్యంగా ఉంచుతాం. చట్టపరంగా చర్యలు తీసుకుంటాం.