TS News: నుమాయిష్‌పై 10వ తేదీ వరకే ఆంక్షలు

ఈనాడు, హైదరాబాద్‌, న్యూస్‌టుడే, ఆబిడ్స్‌: నగరంలోనూ కరోనా కేసులు వేగంగా పెరుగుతున్న నేపథ్యంలో కేంద్ర ప్రభుత్వ మార్గదర్శకాలు, వైద్యారోగ్య శాఖ ఉత్తర్వులను అనుసరించి నాంపల్లి ఎగ్జిబిషన్‌ను మూసేస్తున్నట్లుగా గురువారం సొసైటీ కార్యదర్శి ఆదిత్య మార్గం ప్రకటించారు. అయితే ప్రభుత్వ ఉత్తర్వుల్లో ఎక్కడా నుమాయిష్‌ను పూర్తిగా మూసెయ్యాలని పేర్కొనలేదని, ఈ నేపథ్యంలో ఈ నెల 10వ తేదీ వరకు మాత్రమే వాయిదా వేయాలని పేర్కొంటూ శుక్రవారం తాజా ఉత్తర్వులు జారీ చేసినట్లు హైదరాబాద్‌ పోలీస్‌ కమిషనర్‌ సీవీ ఆనంద్‌ ఒక ప్రకటనలో తెలిపారు. ఈ విషయమై ఆదిత్య మార్గంను సంప్రదించగా.. 10వ తేదీ నాటికి ఉండే పరిస్థితుల ఆధారంగా కార్యవర్గంతో చర్చించి నిర్ణయం తీసుకుంటామని చెప్పారు. ఆంక్షలు తొలగితే... 24 గంటల్లో ప్రారంభించనున్నామని వివరించారు.