పాదచారులకు స్నేహామార్గం

ఆరాంఘర్‌ కూడలిని తీర్చుదిద్దుతారిలా

ఈనాడు, హైదరాబాద్‌: పాదచారులకు ఉపయోగపడేలా నగరంలోని రద్దీ కూడళ్లను వినూత్నంగా అభివృద్ధి చేయాలని జీహెచ్‌ఎంసీ నిర్ణయించింది. బెంగళూరు నగరపాలక సంస్థ అమలు చేస్తోన్న నమూనాను నగరంలో ప్రయోగించేందుకు సిద్ధమైంది. మొదట ఆరాంఘర్‌ చౌరస్తాను రూ.2.63కోట్లతో పాదచారులకు స్నేహపూర్వక కూడలిగా తీర్చిదిద్దేందుకు ఏర్పాట్లు ప్రారంభించింది. ఆరాంఘర్‌ చౌరస్తాలో నిత్యం 20వేలకుపైగా పాదచారులు రోడ్డు దాటుతుంటారు. దీన్ని పాదచారులకు స్నేహపూర్వకంగా అభివృద్ధి చేయాలని బెంగళూరుకు చెందిన జనాగ్రహ అనే సంస్థ జీహెచ్‌ఎంసీకి సూచించింది. జనాగ్రహ సంస్థ పట్టణ అభివృద్ధి, మౌలిక సౌకర్యాల కల్పనలో వినూత్న పద్ధతులపై అన్వేషణ చేస్తుంటుందని అధికారులు చెబుతున్నారు. సదరు సంస్థతో సమాలోచనలు చేసి నగరవ్యాప్తంగా జోన్‌కు రెండు చొప్పున, ఆరు జోన్లలో 12 కూడళ్ల అత్యాధునికంగా అభివృద్ధి చేసేందుకు ప్రణాళిక రూపొందిస్తున్నామని సీనియర్‌ ఇంజినీరు ఒకరు ‘ఈనాడు’తో తెలిపారు. తొలుత కూడలిని విశాలంగా విస్తరించి, అన్ని రోడ్డు మార్గాల వైపున బస్టాపులు నిర్మిస్తారు. ప్రయాణికులు రోడ్డు దాటేందుకు ప్రత్యేక జీబ్రా క్రాసింగ్‌ లైన్లను వేస్తారు. అన్ని వైపుల రోడ్లను కలుపుతూ పాదచారులకు ప్రత్యేక లైన్లను నిర్మిస్తామని రాజేంద్రనగర్‌ సర్కిల్‌ ఈఈ నాగేందర్‌ గౌడ్‌ వివరించారు.