ఆసుపత్రిలో మహిళపై వార్డ్‌బాయ్‌ అత్యాచారం

సైదాబాద్‌, న్యూస్‌టుడే: దిల్‌సుఖ్‌నగర్‌లోని ఓ ప్రైవేటు ఆసుపత్రిలో పనిచేస్తున్న మహిళపై వార్డ్‌బాయ్‌ అత్యాచారం చేసిన ఘటన మలక్‌పేట ఠాణా పరిధిలో చోటుచేసుకుంది. సీఐ శ్రీనివాస్‌ వివరాల మేరకు.. అంబర్‌పేటకు చెందిన మహిళ(40) దిల్‌సుఖ్‌నగర్‌లోని ఓ ప్రైవేటు ఆసుపత్రిలో హౌస్‌ కీపింగ్‌ విభాగంలో పనిచేస్తోంది. జియాగూడకు చెందిన సందీప్‌(25) అక్కడే వార్డ్‌బాయ్‌గా పనిచేస్తున్నాడు. బుధవారం రాత్రి రెండో అంతస్తులో పని ఉందని ఆమెకు చెప్పాడు. అక్కడ శుభ్రం చేస్తుండగా ఆమెపై అత్యాచారానికి పాల్పడ్డాడు. విషయం ఎవరికీ చెప్పొద్దని బెదిరించి పంపించేశాడు. ముభావంగా ఉంటున్న ఆమెను కుటుంబ సభ్యులు కారణం అడగ్గా విషయం చెప్పింది. పోలీసులను ఆశ్రయించడంతో కేసు నమోదు చేశారు.