తపాలా ఉద్యోగి మృతికి కారణమైన ముగ్గురి అరెస్టు

ఖైరతాబాద్‌, న్యూస్‌టుడే: అర్ధరాత్రి అనంతరం వీధుల్లో ఉన్న యువకుల్ని ఏం చేస్తున్నారని ప్రశ్నించినందుకు.. దాడి చేసి ఆ వ్యక్తి మృతికి కారణమైన ముగ్గురిని సైఫాబాద్‌ పోలీసులు అరెస్టు చేశారు. పోలీసుల కథనం ప్రకారం ఈనెల 25 అర్ధరాత్రి 2 గంటల సమయంలో వీధుల్లో ఉన్న యువకులను స్థానికుడైన పోస్టల్‌ ఉద్యోగి విద్యాసాగర్‌.. రోడ్లపై ఏం చేస్తున్నారు, మీరెవరని ప్రశ్నించాడు. మద్యం మత్తులో ఉన్న ముగ్గురు అతన్ని దూషించడంతోపాటు చేతులతో కొట్టడంతో కిందపడిపోయాడు. విషయం తెలుసుకున్న కుటుంబ సభ్యులు వెంటనే స్థానిక ఆస్పత్రికి తరలించగా మృతి చెందినట్లు ధ్రువీకరించారు. దాడికి పాల్పడిన సుల్తాన్‌బజార్‌, కంద స్వామిలేన్‌లో ఉండే గడ్డం సాయినిఖిత్‌(24), మీర్‌పేట్‌లోని ద్వారకామయి కాలనీ వాసి గడ్డం రోహిత్‌(22)తో పాటు మరో బాలుణ్ని(17) అరెస్టు చేశారు. కోర్టులో హాజరుపర్చి రిమాండ్‌కు తరలించారు.