ఫౌండేషన్‌ నుంచి నిరంతర సహకారం: డీసీసీబీ ఛైర్మన్‌

మాట్లాడుతున్న బుయ్యని మనోహర్‌రెడ్డి, ప్రజాప్రతినిధులు

పరిగి గ్రామీణ, న్యూస్‌టుడే: బీఎంఆర్‌ ఫౌండేషన్‌ ద్వారా పరిగి నియోజక వర్గ పేద విద్యార్థుల కోసం నిరంతర సహాయ, సహకారాలు అందిస్తామని బీఎంఆర్‌ ఫౌండేషన్‌ అధినేత, డీసీసీబీ ఛైర్మన్‌ బుయ్యని మనోహర్‌రెడ్డి అన్నారు. నియోజకవర్గ పదో తరగతి విద్యార్థులకు ఈ ఫౌండేషన్‌ ద్వారా స్టడీ మెటీరియల్‌ పంపిణీ కార్యక్రమం జయప్రదమైన సందర్భంగా శనివారం మండల పరిధిలోని గడిసింగాపూర్‌లో ఏర్పాటు చేసిన విలేకరుల సమావేశంలో మాట్లాడారు. 4 వేలకు పైగా విద్యార్థులకు స్టడీ మెటీరియల్‌ను ఉచితంగా అందజేశామన్నారు. ఈసేవలు నిరంతరం కొనసాగిస్తామని చెప్పారు. ప్రజలు ఏది కోరుకుంటే అది చేసేందుకు సిద్ధమని, పార్టీ అధిష్ఠానం ఆదేశిస్తే ఏ పదవికైనా పోటీ చేస్తామని తెలిపారు. మాజీ విపణి ఛైర్మన్లు ఎస్పీ.బాబయ్య, కమతం శ్రీనివాస్‌రెడ్డి మాట్లాడారు. కార్యక్రమంలో దోమ ఎంపీపీ రాఘవేందర్‌, సర్పంచుల సంఘం జిల్లా అధ్యక్షుడు అశోక్‌రెడ్డి, నాయకులు యాదయ్య, రాంచంద్రయ్య, పాలాది శ్రీనివాస్‌, నియోజకవర్గ నాయకులు పాల్గొన్నారు.