Talasani: నా రాజకీయ జీవితం ఎన్టీఆర్‌ పెట్టిన భిక్షే: తలసాని

వివిధ మతాల ప్రముఖులను సన్మానించిన మంత్రి శ్రీనివాస్‌ యాదవ్‌

అమీర్‌పేట, న్యూస్‌టుడే: తన రాజకీయ జీవితం ఎన్టీఆర్‌ పెట్టిన భిక్షేనని, ప్రాణం ఉన్నంత వరకు ఆయన్ను మరిచిపోనని సనత్‌నగర్‌ భారాస అభ్యర్థి తలసాని శ్రీనివాస్‌యాదవ్‌(Talasani Srinivas Yadav) అన్నారు. ఎస్సార్‌నగర్‌ కమ్మ వారి సేవా సమితి ఆధ్వర్యంలో సనత్‌ నగర్‌లోని మోడల్‌ కాలనీలో కార్తిక వనమహోత్సవం నిర్వహించారు. హాజరైన తలసాని మాట్లాడుతూ తనను రాజకీయాల్లోకి తీసుకువచ్చింది ఎన్టీఆర్‌ అని అన్నారు. అమీర్‌పేటలో ఆ మహనీయుడి విగ్రహం ఏర్పాటు చేయించేందుకు చర్యలు తీసుకుంటానని ప్రకటించారు. 

 తెదేపా అధినేత చంద్రబాబును జైలు పంపించడం బాధాకరమన్నారు. రాజకీయ విభేదాలు ఎలా ఉన్నా.. ఓ వ్యక్తిపై కేసులు పెట్టి హింసించాలనే దుర్మార్గపు ఆలోచనను ఎవరూ హర్షించరని తెలిపారు.  సంఘటన జరిగిన నాడే తాను ధైర్యంగా ఖండించానని తెలిపారు.  నిర్వాహకులు కొత్తపల్లి మధుసూదన్‌రావు, రాజారావు, నరేందర్‌ అనిల్‌, సుబ్బయ్య ఆధ్వర్యంలో జరిగిన కార్యక్రమంలో కార్పొరేటర్‌ లక్ష్మి, మాజీ ఎమ్మెల్యే కాట్రగడ్డ ప్రసూన, మాజీ కార్పొరేటర్‌ శేషుకుమారి పాల్గొన్నారు.