ఇంటర్‌ విద్యార్థిని ఆత్మహత్యతో తీవ్ర విషాదం

విశాఖపట్నం, చోడవరం, న్యూస్‌టుడే: అల్లారు ముద్దుగా పెంచుకున్న కుమార్తె ఆత్మహత్య చేసుకోవడంతో ఆ ఇంట తీవ్ర విషాదం నెలకొంది. విశాఖ శివారులోని బోయపాలెం సమీపంలోని ఓ ప్రైవేట్‌ కళాశాల వసతి గృహంలో విద్యార్థిని సోమవారం రాత్రి ఆత్మహత్య చేసుకుంది. ఈ ఘటనకు సంబంధించి పీఎంపాలెం సీఐ వై.రామకృష్ణ కథనం ప్రకారం.. చోడవరం మండలం జన్నవరం గ్రామానికి చెందిన ఓ దంపతులకు ఇద్దరు కుమార్తెలు. తండ్రి లారీ డ్రైవర్‌గా పనిచేస్తున్నాడు. దుబాయి వెళ్లి వచ్చాడు.  భార్య ప్రైవేట్‌ పాఠశాలలో ఉపాధ్యాయిని. వీరి పెద్ద కుమార్తె మధురవాడ దరి బోయపాలెంలోని ఓ ప్రైవేట్‌ కళాశాలలో ఇంటర్‌ చదువుతూ కళాశాల వసతి గృహంలోనే ఉంటోంది. ప్రస్తుతం ద్వితీయ సంవత్సరం పరీక్షలు రాస్తున్న ఆ విద్యార్థిని మార్కులు తక్కువగా వస్తాయన్న భయంతో సోమవారం రాత్రి వసతిగృహంలో ఉరేసుకుంది. కొద్ది రోజులుగా కడుపు నొప్పితో బాధపడుతున్నానని అందువల్ల పరీక్ష బాగా రాయలేదని, మార్కులు తక్కువ వస్తాయన్న భయంతో ఆత్మహత్య చేసుకుంటున్నట్లు లేఖ రాసింది.  పోస్టుమార్టం అనంతరం మంగళవారం సాయంత్రం జన్నవరం పెద్దేరు గట్టు వద్ద అంత్యక్రియలు నిర్వహించారు. కుమార్తె మృతదేహానికి కొరివి పెట్టాల్సివచ్చిందంటూ తండ్రి బోరుమన్నారు. తండ్రి ఫిర్యాదు మేరకు కేసు నమోదు చేసి దర్యాప్తు చేస్తున్నట్లు సీఐ తెలిపారు.