సాయం కోరితే ఖాతాలో నగదు మాయం

జంగారెడ్డిగూడెం పట్టణం, న్యూస్‌టుడే: నగదు డిపాజిట్ చేసేందుకు సాయం కోరిన వ్యక్తి అమాయకత్వాన్ని ఆసరాగా చేసుకుని అతడి బ్యాంకు ఖాతాలో నగదు కాజేసిన ఘటన జంగారెడ్డిగూడెం పట్టణంలో ఆలస్యంగా వెలుగుచూసింది. పోలీసులు తెలిపిన వివరాల ప్రకారం... జంగారెడ్డిగూడెం పట్టణం ఉప్పలమెట్ట ప్రాంతానికి చెందిన వల్లూరి గురుమూర్తి వడ్రంగి. గత నెల 20న బ్యాంకు ఖాతాలో నగదు డిపాజిట్ చేసేందుకు స్థానికంగా ఉన్న కరూర్‌ వైశ్యా బ్యాంకు ఏటీఎంకు వెళ్లాడు. ఈ క్రమంలో అక్కడే ఉన్న షేక్‌ నాగూర్‌బాబు అనేవ్యక్తి సాయం కోరాడు. ఏటీఎం కార్డు, రూ.3 వేల నగదును గురుమూర్తి.. నాగూర్‌బాబుకు ఇవ్వడంతో పాటు పిన్‌ నంబరును సైతం చెప్పాడు. అనంతరం అతడు నగదు డిపాజిట్ చేసి అదే తరహాలో ఉన్న మరో ఏటీఎం కార్డును గురుమూర్తికి ఇచ్చి అక్కడి నుంచి జారుకున్నాడు. ఈ నెల 3న నగదు కోసం ఏటీఎంకు వెళ్లి కార్డు ద్వారా తీసుకునేందుకు గురుమూర్తి ప్రయత్నించగా పిన్‌ నంబరు తప్పని వచ్చింది. దీంతో బ్యాంకు అధికారులను సంప్రదించాడు. ఖాతా నుంచి దఫదఫాలుగా రూ.71 వేలు డ్రా చేసినట్లు తెలపడంతో బాధితుడు సోమవారం పోలీసులను ఆశ్రయించాడు. దీనిపై కేసు నమోదు చేసినట్లు స్టేషన్‌ రైటర్‌ శ్రీనివాసరెడ్డి తెలిపారు.