Corona: ఇన్‌ఫెక్షన్‌పై నిఘా పెట్టే రక్తపరీక్ష

మాడ్రిడ్‌: వ్యక్తుల్లో కరోనా వైరస్‌ ఇన్‌ఫెక్షన్‌ తీరుతెన్నులను ప్రభావవంతంగా పర్యవేక్షించేందుకు దోహదపడగల సరికొత్త రక్తపరీక్షను స్పెయిన్‌లోని యూఎంహెచ్‌-సీఎస్‌ఐసీ న్యూరోసైన్సెస్‌ ఇన్‌స్టిట్యూట్‌ పరిశోధకులు అభివృద్ధి చేశారు. ఏసీఈ-2 అనే ప్రొటీన్‌ పరిమాణాన్ని నిర్ధారించడం ద్వారా ఇది పనిచేస్తుంది. సాధారణంగా ‘ఏసీఈ-2’ ద్వారా కణాల్లోకి కరోనా వైరస్‌ ప్రవేశిస్తుంది. ఈ ప్రొటీన్‌తో వైరస్‌ కలిసినప్పుడు ఏసీఈ-2 తునకలు (ఫ్రాగ్మెంట్లు) ఏర్పడతాయి. వ్యక్తుల్లో కొవిడ్‌ తీవ్రత ఎక్కువగా ఉన్నప్పుడు.. ప్లాస్మాలో పూర్తిస్థాయి పరిమాణంతో కూడిన ఏసీఈ-2 స్థాయులు తక్కువగా ఉంటున్నట్లు శాస్త్రవేత్తలు గుర్తించారు. అదే సమయంలో వాటి ఫ్రాగ్మెంట్ల సంఖ్య పెరుగుతున్నట్లు నిర్ధారించారు. కరోనా నుంచి కోలుకున్న అనంతరం ఈ రెండింటి స్థాయులు తిరిగి సాధారణ స్థితికి చేరుకుంటున్నాయని శాస్త్రవేత్తలు తెలిపారు. తాము అభివృద్ధి చేసిన రక్తపరీక్షతో ఏసీఈ-2, దాని తునకల పరిమాణాలను గుర్తించవచ్చునని.. రక్తంలో వాటి స్థాయులు కరోనా పరిణామ తీరుకు జీవ సూచికలుగా ఉపయోగపడతాయని వారు వెల్లడించారు.