హిమాచల్‌ప్రదేశ్‌ కాంగ్రెస్‌ రెబల్స్‌కు సుప్రీంకోర్టులో దక్కని ఊరట

ఆరుగురు ఎమ్మెల్యేలపై అనర్హత వేటు నిలిపివేతకు నిరాకరణ

దిల్లీ: కాంగ్రెస్‌ పార్టీ విప్‌ను ధిక్కరించి ఎమ్మెల్యే పదవికి అనర్హులైన ఆరుగురు రెబల్స్‌కు సర్వోన్నత న్యాయస్థానంలో ఊరట లభించలేదు. వారిని అనర్హులుగా ప్రకటిస్తూ హిమాచల్‌ప్రదేశ్‌ స్పీకర్‌ తీసుకున్న నిర్ణయంపై నిలుపుదల(స్టే) ఉత్తర్వులు ఇచ్చేందుకు జస్టిస్‌ సంజీవ్‌ ఖన్నా, జస్టిస్‌ దీపాంకర్‌ దత్తాలతో కూడిన ధర్మాసనం సోమవారం నిరాకరించింది. అయితే, ఈ వ్యవహారంలో సభాపతి కుల్దీప్‌ సింగ్‌ పఠానియా కార్యాలయానికి నోటీసు జారీ చేసింది. నాలుగు వారాల్లోగా సమాధానమివ్వాలని ఆదేశించింది. తదుపరి విచారణను మే 6వ తేదీకి వాయిదా వేసింది. తాము ప్రాతినిధ్యం వహించిన అసెంబ్లీ నియోజకవర్గాలకు ఉప ఎన్నికలు నిర్వహించేందుకు ఎన్నికల సంఘం నోటిఫికేషన్‌ ఇచ్చిందని పిటిషనర్లు తెలియజేయగా..ఆ అంశాన్ని పరిశీలించాల్సిన అవసరం ఉందని ధర్మాసనం తెలిపింది. అనర్హత వేటును నిలిపివేసేందుకు మాత్రం తిరస్కరించింది. అసెంబ్లీ కార్యకలాపాల్లో పాల్గొనటానికి అనుమతించేది లేదని కూడా స్పష్టం చేసింది. ఎమ్మెల్యేల అనర్హతతో ఖాళీ అయిన ఆరు అసెంబ్లీ స్థానాలకు నామినేషన్ల ప్రక్రియ మే 7న ప్రారంభం కానుంది.