India Corona : 27 వేలకు దిగొచ్చిన కొత్త కేసులు

1 శాతం దిగువకు క్రియాశీల రేటు..

దిల్లీ : దేశంలో కరోనా మహమ్మారి క్రమంగా అదుపులోకి వస్తోంది. తాజాగా రోజువారీ కేసుల సంఖ్య 30 వేల దిగువకు చేరడం ఊరటకలిగిస్తోంది. మరోవైపు మరణాల సంఖ్య కూడా 350లోపే నమోదైంది. కేంద్ర ఆరోగ్య శాఖ వెల్లడించిన గణాంకాల ప్రకారం..

Δ గడిచిన 24 గంటల్లో 12,29,536 కరోనా నిర్ధారణ పరీక్షలు నిర్వహించగా.. 27,409 కేసులు నమోదయ్యాయి. ఇక రోజువారీ పాజిటివిటీ రేటు 2.23 శాతానికి పడిపోయింది.

Δ నిన్న 347 మరణాలు చోటుచేసుకోగా.. ఇప్పటి వరకూ మరణించిన వారి సంఖ్య 5,09,358కి చేరింది.

Δ గత కొన్ని రోజులుగా కొత్త కేసుల కంటే రికవరీలే ఎక్కువగా నమోదవుతుండటం సానుకూలాంశం. గడిచిన 24 గంటల్లో 82,817 మంది కరోనా నుంచి కోలుకోగా.. ఇప్పటి వరకూ వైరస్‌ను జయించిన వారి సంఖ్య 4.17 కోట్లు దాటింది. దీంతో రికవరీ రేటు 97.82%కి పెరిగింది.

Δ ఇక క్రియాశీల కేసులు కూడా గణనీయంగా తగ్గుతున్నాయి. ప్రస్తుతం దేశంలో 4,23,127 యాక్టివ్‌ కేసులు ఉన్నాయి.  ఈ రేటు 1 శాతం దిగువకు(0.99%) తగ్గింది.

Δ ఇక దేశవ్యాప్తంగా వ్యాక్సినేషన్‌ వేగంగా కొనసాగుతోంది. నిన్న 44,68,365 మంది టీకాలు వేయించుకోగా.. ఇప్పటి వరకూ పంపిణీ చేసిన డోసుల సంఖ్య 173 కోట్లు దాటింది.