Alia Bhatt: ఫ్యామిలీ అంతా.. అల్లు అర్జున్‌తో ఎప్పుడు నటిస్తావని అడుగుతున్నారు?

ఇంటర్నెట్‌ డెస్క్‌: బాలీవుడ్‌ భామ ఆలియా భట్‌ దర్శకధీరుడు రాజమౌళి తెరకెక్కించిన ‘ఆర్‌ఆర్‌ఆర్‌’తో టాలీవుడ్‌లో ఎంట్రీ ఇవ్వనున్నారు. ఈ పాన్‌ఇండియా చిత్రం మార్చి25న థియేటర్లలో ప్రేక్షకుల ముందుకు రానుంది.  అల్లూరి సీతారామరాజుగా రామ్‌చరణ్‌ కనిపించగా.. ఆయన సరసన సీతగా ఆలియా నటించింది.తెలుగులో ఇంకా చాలా సినిమాలు చేయాలని ఉందంటూ తన ఆలోచనలను పంచుకున్న భామ.. మరోసారి తన మనసులోని మాటను బయటపెట్టింది. ‘‘ మా కుటుంబ సభ్యులంతా అల్లు అర్జున్‌ ‘పుష్ప’ చిత్రాన్ని వీక్షించారు. అప్పటి నుంచి వాళ్లంతా బన్నికి అభిమానులైపోయారు. అంతే కాదు.. నువ్వెప్పుడు అల్లు అర్జున్‌తో నటిస్తావ్‌ అని ఫ్యామిలీ అంతా అడుగుతున్నారు. బన్నితో నటించడానికి నేనూ ఎదురుచూస్తున్నా. ఆయనతో నటించే అవకాశం వస్తే.. ఎగిరి గంతులు వేస్తా’’ అని తన భావాలను వ్యక్తపరిచింది. 

ప్రముఖ దర్శకుడు సంజయ్‌ లీలా భన్సాలీ  దర్శకత్వంలో ఆలియా నటించిన ‘గంగూబాయి కతియావాడీ’ ఫిబ్రవరి 25న థియేటర్లలో విడుదల కానుంది. తదుపరి చిత్రాలు రణ్‌బీర్‌తో ‘బ్రహ్మాస్త్ర’, రణ్‌వీర్‌తో ‘రాకీ ఔర్‌ రాణీ కీ ప్రేమ్‌ కహానీ’ షూటింగ్‌ దశలో ఉన్నాయి.