Bedurulanka 2012: సడెన్‌గా ఓటీటీలోకి వచ్చేసిన ‘బెదురులంక’.. స్ట్రీమింగ్‌ ఎక్కడంటే!

హైదరాబాద్‌: ‘ఆర్‌ఎక్స్‌ 100’తో అందరికీ చేరువయ్యారు నటుడు కార్తికేయ (Karthikeya). ఈ హీరో తాజా చిత్రం ‘బెదురులంక 2012’ (Bedurulanka 2012). ఆగస్టులో ప్రేక్షకుల ముందుకు వచ్చిన ఈ చిత్రం మిశ్రమ స్పందనలకే పరిమితమైంది. విభిన్నమైన కథతో రూపొందిన ఈ సినిమాలో కార్తికేయ సరసన నేహాశెట్టి నటించారు. థియేటర్లకు వచ్చిన ప్రేక్షకులకు నవ్వులు పంచిన ఈ చిత్రం ఇప్పుడు ఓటీటీలోకి వచ్చేసింది. ‘అమెజాన్‌ ప్రైమ్‌ వీడియో’ (Amazon Prime Video) వేదికగా ప్రస్తుతం స్ట్రీమింగ్‌ అవుతోంది. ఎటువంటి సమాచారం లేకుండా ఓటీటీలోకి రావడంతో సినీప్రియులు ఆశ్చర్యపోతున్నారు. యుగాంతం నేపథ్యంలో వచ్చిన ఈ కథకు క్లాక్స్‌ దర్శకత్వం వహించారు.

కుమార్తె మృతి.. విజయ్‌ ఆంటోనీ ఎమోషనల్‌ పోస్ట్

కథేంటంటే: డిసెంబరు-2012.. యుగాంతం జరగబోతుందంటూ ప్రచారం జోరు మీదున్న సమయమిది. ఆంధ్రప్రదేశ్‌లోని మారుమూల లంక గ్రామమైన బెదురులంక ప్రజల్లో ఈ యుగాంతపు భయాలు అప్పటికే మరింతగా నాటుకుపోయాయి. దీంతో ఆ భయాల్ని.. ఊరి ప్రజల అమాయకత్వాన్ని అడ్డం పెట్టుకొని అందర్నీ దోచేయాలని ప్రణాళిక రచిస్తాడు ఆ గ్రామంలో పెద్ద మనిషిగా చెలామణి అయ్యే భూషణం (అజయ్‌ ఘోష్‌). తన ప్రణాళిక అమలు చేయడం కోసం బ్రహ్మం (శ్రీకాంత్‌ అయ్యంగార్‌) అనే ఓ దొంగ బాబాను, డేనియల్‌ (రామ్‌ప్రసాద్‌) అనే ఫేక్‌ పాస్టర్‌ను పావులుగా ఎంచుకుంటాడు.  వారి సహాయంతో ఊరి ప్రజల బంగారం మొత్తం కొల్లగొట్టడానికి ఓ ఎత్తుగడ వేస్తాడు. సరిగ్గా అదే సమయానికి సిటీలో ఉద్యోగం మానేసి ఊరిలోకి అడుగుపెడతాడు శివ (కార్తికేయ). తన మనసుకు నచ్చినట్లు బతికే శివ.. బ్రహ్మం, డేనియల్‌ల మాటల్ని అసలు లెక్కచేయడు. ఆ వ్యక్తిత్వంతోనే ఊరిని దోచేయాలన్న భూషణం పన్నాగాలకు ఎదురు నిలుస్తాడు. ఈ క్రమంలోనే తనెంతగానో ప్రేమించిన ఆ ఊరి ప్రెసిడెంట్‌ (గోపరాజు రమణ) కూతురు చిత్ర (నేహా శెట్టి)కి, పుట్టిన ఊరికి, కన్నవాళ్లకు దూరంగా వెళ్లాల్సిన పరిస్థితులు తలెత్తుతాయి. మరి ఆ తర్వాత ఏమైంది? యుగాంతం పేరుతో ఊరి ప్రజల్ని దోచేయాలనుకున్న భూషణం కుట్రల్ని అతనెలా తిప్పి కొట్టాడు? భక్తి ముసుగులో మోసాలకు పాల్పడుతున్న బ్రహ్మం, డేనియల్‌ల నిజ స్వరూపాల్ని ఎలా బయట పెట్టాడు? ప్రేమించిన అమ్మాయిని ఎలా దక్కించుకున్నాడు? అన్నది మిగతా కథ.