bhoot police: ఓటీటీలోనే సైఫ్‌ మూవీ..!

సెప్టెంబరులో విడుదల

ముంబయి: కరోనా సెకెండ్‌వేవ్‌ దెబ్బకు థియేటర్లు అన్నీ మూతపడిన విషయం తెలిసిందే. ఇటీవలే సల్మాన్‌ ‘రాధే’ ఓటీటీలో విడుదలవ్వగా, ఇప్పుడు సైఫ్‌ అలీఖాన్‌ ‘భూత్‌పోలీస్‌’ సైతం అటువైపే అడుగులు వేస్తున్నట్లు ఆ చిత్ర నిర్మాతల్లో ఒకరైన రమేష్ తౌరానీ తెలిపారు. ఇటీవల ఓ ఇంటర్వ్యూలో ఆయన మాట్లాడుతూ.. ‘‘పరిస్థితులు చూస్తే ఇప్పట్లో థియేటర్లు ప్రారంభమయ్యేలా లేవు. నవంబరు ముందైనా 50శాతం అనుమతితో తెరుస్తారో లేదో ప్రశ్నార్థకమే. అందుకే ఓటీటీ బాట పట్టాల్సి వస్తోంది. దీనికి ఈ చిత్ర నటీనటులు ఎవరూ అభ్యంతరం వ్యక్తం చేయలేదు. అందుకే డిస్నీహాట్‌ స్టార్‌లో సెప్టెంబరులో విడుదల చేయనున్నాం’’ అన్నారు.

హారర్‌-కామెడీ నేపథ్యంలో ఈ చిత్రాన్ని తెరకెక్కించారు దర్శకుడు పవన్ కృపలాని. సైఫ్‌అలీఖాన్‌, అర్జున్‌కపూర్‌, యామీగౌతమ్‌, జాక్వెలిన్ ఫెర్నాండజ్‌ ప్రధానపాత్రలు పోషించగా టాలీవుడ్‌ సినిమాటోగ్రాఫర్‌ జయకృష్ణ గుమ్మాడి ఈ చిత్రాన్ని చిత్రీకరించారు. రమేష్‌ తౌరానీ, అక్షయ్‌ పూరీ నిర్మాతలుగా వ్యవహరించారు.