బోరాట్‌: ఆస్కార్‌కు‌ నామినేటై.. గిన్నిస్‌‌ రికార్డు కొట్టింది

ఇంటర్నెట్‌ డెస్క్‌: సినీ ప్రపంచం అత్యంత ప్రతిష్టాత్మకంగా భావించే ఆస్కార్‌ అవార్డుల కోసం ఇటీవల పలు సినిమాలు నామినేట్‌ అయిన విషయం తెలిసిందే. గతేడాది విడుదలైన బోరాట్‌ సీక్వెల్‌ ‘బోరాట్‌-2’ చిత్రం కూడా ఆస్కార్‌ బరిలో నిలిచింది. అడాప్టెడ్‌ స్క్రీన్‌ప్లే, ఉత్తమ సహాయనటి(బాకలోవా) విభాగాల్లో ఈ చిత్రం నామినేట్‌ అయింది. కాగా.. ఈ సినిమా మరో అరుదైన రికార్డును కూడా సృష్టించింది. ‘ఆస్కార్‌కు  నామినేటైన అతిపెద్ద సినిమా టైటిల్‌’ ఉన్న చిత్రంగా గిన్నిస్‌ వరల్డ్‌ రికార్డ్స్‌లోకి ఎక్కింది. బోరాట్‌-2 సినిమా పూర్తి టైటిల్‌ ‘‘బోరాట్‌ సబ్‌సీక్వెంట్‌ మూవీఫిల్మ్‌: డెలివరీ ఆఫ్ ప్రొడీజియస్‌ బ్రైబ్‌ టు అమెరికన్‌ రెజిమ్‌ ఫర్‌ మేక్‌ బెనిఫిట్‌ వన్స్‌ గ్లోరియస్‌ నేషన్‌ ఆఫ్‌ కజకిస్థాన్‌(Borat Subsequent Moviefilm: Delivery of Prodigious Bribe to American Regime for Make Benefit Once Glorious Nation of Kazakhstan). ఈ సినిమా ఇంగ్లిష్‌ టైటిల్‌లో 110 అక్షరాలు ఉన్నాయి. అందుకే గిన్నిస్‌బుక్‌లో చోటు సంపాదించుకుంది.

బోరాట్‌ తొలిచిత్రం ‘బోరాట్‌: కల్చరల్‌ లెర్నింగ్స్‌ ఆఫ్‌ ఆమెరికా ఫర్‌ మేక్‌ బెనిఫిట్స్‌ గ్లోరియస్‌ నేషన్‌ ఆఫ్‌ కజకిస్థాన్‌’ 2006లో విడుదలైంది. కజకిస్థాన్‌కు చెందిన బోరాట్ అనే జర్నలిస్టు అమెరికాపై ఒక డాక్యుమెంటరీ తీయడానికి ఆ దేశానికి వెళ్తాడు. అక్కడ తనకు ఎదురైన అనుభవాలే సినిమా కథాంశం. ఈ సినిమాపై పలు విమర్శలు, వివాదాలతోపాటు ప్రశంసలు కూడా లభించాయి. ఆ తర్వాత 2020లో ‘బోరాట్‌-2 తెరకెక్కింది. దేశానికి చెడ్డపేరు తెచ్చాడన్న నేరంపై జైలు శిక్ష అనుభవించిన బోరాట్.. 14ఏళ్లు తర్వాత జైలు నుంచి విడుదలవుతాడు. అతడికి కజకిస్థాన్‌లోని ఓ నేత పని అప్పగిస్తాడు. ఆ పని మీద మళ్లీ అమెరికా వెళ్లిన బోరాట్ ఏం చేశాడన్నది మిగతా కథ. గతేడాది అక్టోబర్‌లో ఓటీటీ అమెజాన్‌ ప్రైమ్‌లో విడుదలైంది. అయితే,‌ ఆ సమయంలో అమెరికాలో ఎన్నికలు జరుగుతున్న నేపథ్యంలో పలు విమర్శలను ఎదుర్కొంది. కొన్ని చోట్ల ఈ సినిమాని నిషేధించాలని పిటిషన్లు దాఖలయ్యాయి. ఈ సినిమాపై ఆస్కార్‌ నామినేషన్‌ నుంచి అనర్హత వేటు వేయాలని ఇటీవల కజక్‌ అమెరికన్‌ అసోసియేషన్‌ అకాడమీ అవార్డ్స్‌ నిర్వాహకులను కోరింది.