AR Rahman: ఆయన్ని నిందించకండి.. ఏ.ఆర్‌.రెహమాన్‌ కోసం సెలబ్రెటీల ట్వీట్స్‌

చెన్నై: తాజాగా ఏ.ఆర్‌.రెహమాన్‌ (AR Rahman) కాన్సర్ట్‌లో తీవ్ర గందరగోళం తలెత్తిన సంగతి తెలిసిందే. టికెట్ల కోసం అధికమొత్తంలో డబ్బు చెల్లించినప్పటికీ కనీసం స్టేజ్ దాక కూడా చేరుకోలేకపోవడంతో అభిమానులు తీవ్ర ఇబ్బందులు ఎదుర్కొన్నారు. దీనిపై నెటిజన్లు, రెహమాన్‌ అభిమానులు ఆ కాన్సర్ట్‌ నిర్వాహకులను తిట్టిపోస్తున్నారు. అలాగే మరికొందరు రెహమాన్‌ను కూడా విమర్శిస్తూ పోస్ట్‌లు పెడుతున్నారు. దీంతో పలువురు సెలబ్రెటీలు ఆయనకు మద్దతుగా ట్వీట్స్ చేస్తున్నారు.

ప్రముఖ తమిళ హీరో కార్తి (Karthi) ఈ ఘటనపై ట్వీట్‌ చేశారు. ‘మనందరికీ రెహమాన్‌ 3 దశాబ్దాల నుంచి తెలుసు. ఎంతోమందికి ఆయన అభిమాన సంగీత దర్శకుడు. తాజాగా జరిగిన ఘటన కారణంగా ఆయన కూడా ఎంతో బాధపడుతుంటారు. ఆ కచేరీకి వెళ్లిన వారిలో నా కుటుంబం కూడా ఉంది. వాళ్లు కూడా ఇబ్బంది పడ్డారు. దీనికి పూర్తి బాధ్యత ఆ ఈవెంట్‌ నిర్వాహకులు తీసుకుంటారని భావిస్తున్నాను. రెహమాన్‌ ఎప్పుడూ తన చుట్టూ ఉండే వాళ్లపై ప్రేమానురాగాలు కలిగి ఉంటారు. ఈ ఘటనకు ఆయన్ని బాధ్యుడిని చేయకండి’ అని పేర్కొన్నారు. 

 సెప్టెంబర్‌ 28.. వెనక్కి వెళ్లిన మరో రెండు సినిమాలు!

అలాగే నటి ఖుష్భూ (Khushbu) కూడా దీనిపై స్పందించారు. ‘ రెహమాన్‌ ఈవెంట్‌లో అంతమంది ఇబ్బంది పడడం దురదృష్టకరం.  ఆ కాన్సర్ట్‌కు నా కుమార్తెలు, వాళ్ల స్నేహితులు కూడా వెళ్లారు. వాళ్లకు డైమండ్‌ పాస్‌ ఉన్నప్పటికీ లోపలికి ప్రవేశించడానికి అనుమతి లభించలేదు. పాస్‌ వివరాలు చూపించి వాళ్లు లోపలికి వెళ్లడానికి మూడు గంటల సమయం పట్టింది. ఆ సమస్యకు రెహమాన్ బాధ్యత వహించలేడు. ఆయనకు ఉన్న అభిమానులను దృష్టిలో పెట్టుకోవడంలో ఈవెంట్‌ నిర్వాహకులు పూర్తిగా విఫలమయ్యారు. ఈ విషయంలో రెహమాన్‌ను నిందించకండి. ఆయన తన అభిమానులను ఎప్పుడూ నిరాశపరచరు. మనమంతా ఆయనతో ఉందాం’ అంటూ #standwithARR అనే హ్యాష్ ట్యాగ్‌ను జోడించారు.

సంగీత దర్శకుడు యువన్ శంకర్‌ రాజా (Yuvan Shankar Raja) కూడా ఈ ఘటన దురదృష్టకరమని అన్నారు. ‘ఇలాంటి కచేరీలు నిర్వహించడం చాలా కష్టమైన పని, జనాలను నియంత్రించడంలో సమస్యలు ఎదురవుతాయి. ఇది నిర్వాహకులతో పాటు పాల్గొన్నవారిపై కూడా ఎంతో ఒత్తిడి కలిగిస్తుంటుంది. ఈ విషయంలో తోటి కళాకారుడిగా నేను రెహమాన్‌కు  మద్దతు ఇస్తాను’ అని తెలిపారు. ఇక ఈ విషయంపై ఏఆర్‌ రెహమాన్‌  ఇప్పటికే స్పందించిన సంగతి తెలిసిందే. ‘‘దురదృష్టకర పరిస్థితుల కారణంగా కాన్సర్ట్‌లోకి అడుగుపెట్టలేకపోయిన వారు.. తాము కొనుగోలు చేసిన టికెట్‌, తమకు ఎదురైన ఇబ్బందులను తెలియజేస్తూ arr4chennai@btos.in లో పోస్ట్‌ చేస్తే నా టీమ్‌ అతిత్వరలో మిమ్మల్ని సంప్రదిస్తుంది’’ అని పేర్కొన్నారు.