Miss Shetty Mr Polishetty: మిస్టర్‌ పొలిశెట్టితో మిస్‌ శెట్టి.. టైటిల్‌తో పాటు ఫస్ట్‌ లుక్‌ విడుదల

అనుష్క... నవీన్‌ పొలిశెట్టి - ఈ కలయికే ప్రేక్షకుల్లో ఆసక్తిని రేకెత్తించింది. ‘జాతిరత్నాలు’ తర్వాత నవీన్‌ పొలిశెట్టి, ‘నిశ్శబ్దం’ తర్వాత అనుష్క ప్రధాన పాత్రధారులుగా యు.వి.క్రియేషన్స్‌ పతాకంపై ఓ చిత్రం రూపొందుతున్న సంగతి తెలిసిందే. మహేష్‌బాబు.పి దర్శకత్వం వహిస్తున్నారు. వంశీ - ప్రమోద్‌ నిర్మాతలు. ఈ వేసవిలోనే తెలుగుతోపాటు, తమిళం, కన్నడ, మలయాళ భాషల్లో ప్రేక్షకుల ముందుకు రానున్న ఈ సినిమాకి ‘మిస్‌ శెట్టి మిస్టర్‌ పొలిశెట్టి’ అనే పేరుని ఖరారు చేశారు. బుధవారం సినిమా పేరుని ప్రకటించడంతోపాటు, లుక్‌ని విడుదల చేశారు. ఈ చిత్రంలో కథానాయకుడు నవీన్‌ పొలిశెట్టి... సిద్ధు పొలిశెట్టి అనే స్టాండప్‌ కమెడియన్‌ పాత్రలోనూ, కథానాయిక అనుష్క... అన్విత రవళిశెట్టి అనే షెఫ్‌ పాత్రలోనూ నటించారు. ‘‘అనుష్క, నవీన్‌  కొంచెం విరామం తీసుకుని చేసిన చిత్రమిది. ఆసక్తికరమైన ఈ కలయికపై భారీ అంచనాలున్నాయి. అందుకు తగ్గట్టుగానే సినిమా రూపొందుతోంద’’ని సినీ వర్గాలు తెలిపాయి. ఈ చిత్రానికి సంగీతం: రధన్‌, ఛాయాగ్రహణం: నీరవ్‌ షా.