‘కేజీఎఫ్‌2’లో టాలీవుడ్‌ నటుడు

ఫొటో షేర్‌ చేసిన చిత్రబృందం 

హైదరాబాద్‌: ప్రముఖ టాలీవుడ్‌ నటుడు రావురమేష్‌ ‘కేజీఎఫ్‌2’ సెట్‌లో సందడి చేశారు. 2018లో విడుదలై బాక్సాఫీస్‌ వద్ద బ్లాక్‌బస్టర్‌ విజయాన్ని సొంతం చేసుకున్న ‘కేజీఎఫ్‌’ సినిమాకు ప్రస్తుతం స్వీకెల్‌ తెరకెక్కుతున్న విషయం తెలిసిందే. ‘కేజీఎఫ్‌ ఛాప్టర్2’ పేరుతో తెరకెక్కుతున్న ఈ సీక్వెల్‌కు ప్రశాంత్‌ నీల్‌ దర్శకత్వం వహిస్తున్నారు. యశ్‌ కథానాయకుడు. ప్రస్తుతం ఈ సినిమా షూటింగ్‌ శరవేగంగా జరుగుతుంది. అయితే ‘కేజీఎఫ్‌’కు ఉన్న క్రేజ్‌ను దృష్టిలో ఉంచుకుని ‘కేజీఎఫ్2’ను మరింత అద్భుతంగా తెరకెక్కించేందుకు పనిచేస్తున్నానని దర్శకుడు ఇటీవల తెలిపారు. ఈ నేపథ్యంలో తాజాగా ‘కేజీఎఫ్‌2’ బృందంలోకి కొత్త నటీనటులు వచ్చి చేరుతున్నారు. 

ఇప్పటికే బాలీవుడ్‌ నటుడు సంజయ్‌ దత్‌ ‘అధీర’ పాత్రలో కనిపించనున్నండగా.. బాలీవుడ్‌ నటి రవీనా టాండన్‌ ఆదివారం ‘కేజీఎఫ్‌2’ బృందంలోకి అడుగుపెట్టారు. ఇదిలా ఉండగా నేడు ఈ బృందంలోకి ప్రముఖ టాలీవుడ్‌ నటుడు రావురమేష్‌ వచ్చి చేరారు. ‘కేజీఎఫ్‌2’ సినిమాలో ఆయన ఓ మంచి పాత్రలో కనిపించనున్నారు. ఈ మేరకు రావురమేష్‌, దర్శకుడు ప్రశాంత్‌నీల్‌ కలిసి దిగిన ఓ ఫొటోను చిత్ర నిర్మాణ సంస్థ ట్విటర్‌ వేదికగా షేర్‌ చేసింది. మరోవైపు ప్రశాంత్‌నీల్‌ సైతం ట్విటర్‌ వేదికగా ఓ ట్వీట్‌ పెట్టారు. ‘‘కేజీఎఫ్‌2’ సామ్రాజ్యంలోకి రావు రమేష్‌ సర్‌కు స్వాగతం. వెండితెరపై చూపించేవరకూ మీరు ఎలాంటి పాత్రలో కనిపించనున్నారో తెలుసుకోమని ప్రేక్షకులకే వదిలేస్తున్నాం. ‘కేజీఎఫ్‌2’లో భాగమైనందుకు ధన్యవాదాలు’ అని ప్రశాంత్‌ నీల్‌ పేర్కొన్నారు.