Mahesh Bhatt: ఏ డాక్టర్‌ దగ్గరకు వెళ్లకుండానే ఆ వ్యసనం నుంచి బయటపడ్డా : మహేశ్‌ భట్‌

ముంబయి: బాలీవుడ్‌లో నిర్మాతగా, దర్శకుడిగా అభిమానులను సొంతం చేసుకున్నారు మహేశ్‌ భట్‌(Mahesh Bhatt). ఇటీవల ఓ ఇంటర్య్వూలో ఆయన మాట్లాడుతూ  కుమార్తె షాహీన్‌ భట్‌ కోసం తన అలవాట్లను ఎలా మార్చుకున్నారో చెప్పారు. ‘‘మద్యం మానేయడం ఓ యుద్ధం. నేను అందులో గెలిచాను. నేను మద్యం మానేశానంటే ప్రజలు ఆశ్చర్యపోతారు. కానీ అది నిజం. అందుకు కారణం నా కుమార్తె షాహీన్‌ భట్‌. షాహీన్‌ను నా చేతుల్లోకి తీసుకున్నప్పుడు తను నా నుంచి దూరం జరుగుతూ ఉండేది. అది నాకు నచ్చలేదు. ఆ చిన్నారి జీవితం నాకు ఏదో చెబుతోందని భావించి తాగడం మానేశాను. అప్పుడే నాలో ఓ తండ్రి పుట్టాడు. ఏ డాక్టర్‌ దగ్గరికీ వెళ్లకుండానే నేను ఆ వ్యసనం నుంచి బయటపడ్డాను. నన్ను మార్చింది నా కుమార్తే’’అని మహేశ్‌ భట్‌ పేర్కొన్నారు. 

మహేశ్‌ భట్‌ ఎదుర్కొన్న ఆటుపోట్లను గురించి గతంలో ఆయన రెండో కుమార్తె అలియా భట్‌ (Alia Bhatt) మాట్లాడారు. ‘‘మా నాన్న తెరకెక్కించిన చిత్రాలు వరుసగా ఫ్లాప్‌ అయ్యాయి. దాంతో ఆయన మద్యానికి బానిస అయ్యారు. ఆర్థిక ఇబ్బందులు ఎదుర్కొన్నాం. కొంతకాలానికి ఆయన మద్యాన్ని వదిలేశారు. నా తల్లిదండ్రులిద్దరూ ఎంతో శ్రమించి తిరిగి ఈ స్థాయికి చేరుకున్నారు’’ అని తెలిపారు.  

‘డాడీ’, ‘ఆషికీ’, ‘కబ్జా’, ‘సడక్‌’, ‘క్రిమినల్‌’ వంటి చిత్రాలకు మహేశ్‌ భట్‌ దర్శకత్వం వహించారు. 1984లో ఆయన రూపొందించిన ‘సారాంశ్’ 14వ మాస్కో అంతర్జాతీయ ఫిల్మ్‌ ఫెస్టివల్‌లో ప్రదర్శించారు.