Nenu Student Sir: పోలీస్‌స్టేషన్‌పై బెల్లకొండ గణేశ్‌ కంప్లెయింట్‌.. ఎందుకంటే?

హైదరాబాద్‌: సాధారణంగా ఏదైనా వస్తువు పోతే, పోలీస్‌ స్టేషన్‌లో ఫిర్యాదు చేస్తాం. కానీ, యువ కథానాయకుడు బెల్లకొండ గణేశ్‌ ఏకంగా పోలీస్‌స్టేషన్‌పైనే కంప్లెయింట్‌ చేశాడు. ఆయన కీలక పాత్రలో రాఖీ ఉప్పలపాటి దర్శకత్వం వహిస్తున్న చిత్రం ‘నేను స్టూడెంట్‌ సర్‌’. అవంతిక దస్సాని కథానాయిక. శనివారం ఈ చిత్ర టీజర్‌ను దర్శకుడు వి.వి.వినాయక్‌ విడుదల చేశారు. తాను ఎంతో కష్టపడి రూ.89,999 పెట్టి  కొనుకొన్న ఐఫోన్‌ పోవటానికి పోలీసులే కారణం అంటూ బెల్లకొండ గణేశ్‌ కమిషనర్‌కు ఫిర్యాదు చేయడంతో పోలీసులు ఆశ్చర్యపోతారు. ఇంతకీ ఆ ఫోన్‌ ఎలా పోయింది? అందులో పోలీసుల పాత్ర ఏంటి? చివరకు ఆ ఫోన్‌ దొరికిందా? తెలియాలంటే సినిమా చూడాల్సిందే. మహతి స్వరసాగర్‌ ఈ సినిమాకు సంగీతం అందిస్తున్నారు.