Rangabali: వంగవీటి రంగా స్ఫూర్తితో హీరో పాత్ర.. నాగశౌర్య రియాక్షన్‌ ఏంటంటే?

ఇంటర్నెట్‌ డెస్క్‌: నాగశౌర్య (Naga Shaurya) హీరోగా దర్శకుడు పవన్‌ బాసంశెట్టి (Pawan Basamsetti) తెరకెక్కించిన చిత్రం.. ‘రంగబలి’ (Rangabali). యుక్తి తరేజా (YuktiThareja) కథానాయిక. ఈ సినిమా జులై 7న ప్రేక్షకుల ముందుకు రానుంది. ఈ సందర్భంగా చిత్ర బృందం హైదరాబాద్‌లోని ‘ఏఏఏ సినిమాస్‌’ (AAA Cinemas)లో ట్రైలర్‌ని విడుదల చేసింది. అనంతరం మీడియా అడిగిన ప్రశ్నలకు సమాధానమిచ్చింది.

* రెండు హిట్‌ చిత్రాల టైటిల్స్‌తో ‘రంగబలి’ అని పెట్టారా?

పవన్‌: ఈ సినిమా టైటిల్‌ని ఆ కోణంలో పెట్టలేదు. రంగబలి అనే సెంటర్‌ చుట్టూ అల్లుకథ ఇది. దాంతో, ఆ పేరు అయితేనే బాగుంటుందని ఎంపిక చేశాం. అందులో ‘రంగస్థలం’, ‘బాహుబలి’ పేర్లు కలిశాయి.

* టైటిల్‌ చూసిన చాలా మంది ఇదొక పీరియాడికల్‌ చిత్రమనుకున్నారు. కానీ, టీజర్‌, ట్రైలర్‌ ఆ నేపథ్యం కాదని తెలియజేస్తున్నాయి. దీని గురించి ఏమంటారు?

పవన్‌: ఆసక్తిగా ఉంది కదా అని టైటిల్‌ని పెట్టలేం. కథకు ఏది సెట్‌ అవుతుందో అదే పెడతాం. రంగబలి నేపథ్య సినిమా కాబట్టి అదే పేరును పెట్టాం. అంచనాల కోసం కాదు.

* ఇందులోని హీరో పాత్ర వంగవీటి రంగా స్ఫూర్తితో రూపొందినట్టుగా అనిపిస్తోంది!

నాగశౌర్య: కాదండీ (నవ్వుతూ). ఇదొక ఊరిలోని సెంటర్‌ చుట్టూ తిరిగే స్టోరీ. ఇది ఏ వ్యక్తికీ, ఆంధ్రప్రదేశ్‌లో ఒకప్పుడు చోటుచేసుకున్న సంఘటనలకూ సంబంధించింది కాదు.

* ప్రేక్షకుల్లో మీకు క్లీన్‌ ఇమేజ్‌ ఉంది. ట్రైలర్‌లో చూస్తే అసభ్యకరమైన డైలాగ్‌ ఒకటి వినిపించింది. అది అవసరమంటారా?

నాగశౌర్య: నాకు కావాలనుకుంటే నా గత చిత్రాల్లోనే అలాంటి సంభాషణలు పెట్టొచ్చు. నా నుంచి దర్శకుడు ఏం కోరుకున్నాడో అలానే నేను నటించా. నేను చెయ్యను అంటే ఎలా? అయినా ఎవరికి కోపమొచ్చినా తిడతారేగానీ పాటలు పాడతారా?

* గేయ రచయిత అనంత శ్రీరామ్‌ని నటుడిగా మార్చడానికి కారణం?

పవన్‌: ఓ ఇంటర్వ్యూలో పాల్గొన్న అనంత శ్రీరామ్‌ ఉత్సాహం చూసి ముచ్చటేసింది. నా సినిమాలో ఆయనకు ఓ క్యారెక్టర్‌ రాస్తే బాగుంటుందనిపించింది. ఆయన్ను కలిసి నా మనసులో మాట చెప్పగానే అంగీకరించారు.