Sai pallavi: సాయి పల్లవి పెళ్లిపై మరోసారి రూమర్స్‌.. క్లారిటీ ఇచ్చిన దర్శకుడు

హైదరాబాద్‌: నటి సాయి పల్లవికి (Sai Pallavi) సంబంధించిన ఓ ఫొటో రెండు రోజుల నుంచి సోషల్ మీడియాలో వైరల్‌గా మారింది. దర్శకుడు రాజ్‌కుమార్‌ పెరియస్వామితో ఆమె ఉన్న ఫొటోను షేర్‌ చేస్తూ.. సాయిపల్లవి పెళ్లి చేసుకున్నారంటూ కొందరు నెటిజన్లు ప్రచారం చేస్తున్నారు. అయితే, ఆ వార్తలో ఎటువంటి వాస్తవం లేదని తేలింది.

నటుడు శివ కార్తికేయన్‌తో కలిసి సాయి పల్లవి ఓ సినిమా చేయనున్న విషయం తెలిసిందే. రాజ్‌కుమార్‌ పెరియస్వామి ఆ చిత్రానికి దర్శకత్వం వహించనున్నారు. 'SK21' అనే వర్కింగ్‌ టైటిల్‌తో ఇది రూపొందుతోంది. ఈ సినిమా పూజా కార్యక్రమంలో భాగంగా చిత్రబృందంతో పాటు సాయిపల్లవి, దర్శకుడు కూడా మెడలో దండలు వేసుకుని ఫొటోలు దిగారు. ఇప్పుడు ఆ ఫొటోను షేర్‌ చేస్తూ ఆమె పెళ్లి అంటూ రూమర్స్‌ సృష్టిస్తున్నారు. ఇదే విషయంపై ‘విరాటపర్వం’ దర్శకుడు వేణు ఊడుగుల కూడా క్లారిటీ ఇచ్చారు. ఆ ఫొటో సినిమా ప్రారంభం సందర్భంగా తీయించుకున్నట్లు తెలుపుతూ తన సోషల్ మీడియాలో పోస్ట్‌ చేశారు.

ప్రస్తుతం నాగచైతన్య హీరోగా తెరకెక్కనున్న సినిమాలో సాయి పల్లవి నటించనుంది. ఈ చిత్రానికి చందూ మొండేటి దర్శకత్వం వహించనున్నారు. ప్రీ ప్రొడక్షన్స్‌ పనులు శరవేగంగా జరుగుతున్న ఈ సినిమా చిత్రీకరణ త్వరలోనే ప్రారంభం కానుంది. #NC23 అనే వర్కింగ్‌ టైటిల్‌తో ఇది రూపొందనుంది.